Baukau, 17 Marsu 2026

Primeiru-Ministru Kay Rala Xanana Gusmão tersa ohin halo vizita ofisiál bá iha munisípiu Baukau hafoin konklui nia vizita ofisiál iha munisípiu Lautem.

Iha vizita ne’e hetan akompañamentu husi Ministru Transportes no Komunikasaun, Eng.Miguel Marques Gonçalves Manetelu no membru governu balu.

Governu kontinua intensifika preparativu bá implementasaun desentralizasaun administrativa iha nivel Munisípiu iha teritóriu Timor laran tomak, inklui preparasaun bá eleisaun Kámara Munisipál ne’ebé sei akontese iha tinan 2027.

Vizita ne’e hodi haree besik kondisaun minima munisípiu baukau hodi simu poder lokál.

Prezidente Autoridade Munisípiu Baukau, Veneranda Lemos hateten Komunidade forte nasaun forte, laiha dalan seluk maka poder lokál.

Planu dezenvolvimentu munisípiu Baukau 2025-2030 mai ho vizaun hakarak transforma Baukau sai munisípiu ne'ebé reziliente no inkluzivu ho ekonomi diversifikadu bá prosperiedade ema hotu.

Baukau mai ho vizaun promove dezenvolvimentu inkluzivu no sustentavél liuhusi diversifikasaun ekonomia iha agrikultura, peska, industria kiik no turizmu kreativu.

Fasilita asesu bá merkadu kréditu no koñesimentu negósiu bá ema hotu liu-liu feto, juventude no ema ho defisiensia.

Hadia parseria investimentu entre komunidade, setór privadu no governu atu kria empregu no valór ekonomiku. Valoriza identidade kulturál no solidariedade komunidade ho governasaun taransparente no paritsipativu. Hametin rezilensia klimátika liuhusi protesaun ambiente, enérjia renovável, ekonomia matak no azúl.

Primeiru-Ministru Kay Rala Xanana Gusmão subliña Atu forma governu lokál laos tau de’it ema, laos harii de'it estrutura tenke iha kapasitasaun, ajuda fó hanoin saida mak tenke halo to’o suku sira no prioridade saida de'it mak iha munisípiu Baukau.

"Imi hotu iha obrigasaun atu koñese munisípiu baukau nia prioridade saida, hodi nune’e bainhira imi deskuti halo planeamentu tanba imi rasik mak sei hetan osan, imi rasik mak sei jere , tinan ida ne’e mak imi jere ladun diak, imi presiza tinan ida tan atu jere, tinan ida ne’e mak imi planu didi’ak, aprezenta mai ezekuta ho di'ak bele iha ona konfiansa katak imi bele kaer rasik imi nia kuda talin, ne’e duni problema laos entrega atu sai governu lokál hanesan baze ida" PM Xanana subliña.

PM Xanana afirma Tinan ne’e sei comemora tinan 24 Timor-Leste nia restaurasaun indepéndensia, tanba ne’e mak hasoru malu iha fatin ne'e, hodi halo reflesaun ida husi tinan 2002 to’o agora ita halo ona saida, ita iha vizaun bá futuru ka lae, ita halo at iha ne'ebé ita tenke muda halo di’ak iha ne'ebé, ita tenke hadia di’ak liutan tanba dezenvolviemntu laos iha tinan tinan ita halo deit planu, tenke iha vizaun naruk ida tanba konstruksaun nasaun persiza iha dezenvolvimentu ne’e duni perisza intelektuál sira no ema hotu nia kontribuisaun bá dezenvolvimentu nasionál.

https://sdi.gov.tl/ministerio/presrealease/create 

𝐌𝐞́𝐝𝐢𝐚 𝐌𝐓𝐊