𝐋𝐀𝐔𝐓𝐄𝐌, 𝟏𝟓 𝐌𝐀𝐑𝐒𝐔 𝟐𝟎𝟐𝟔 – Ministério da Agricultura, Pecuária, Pescas e Florestas (MAPPF), domingu liubá fahe Cool Box ho Frizer ba peskadór na’in-23, no husik lenuk-oan, iha Suku Com, Postu Administrativu Lautém, Munisípiu Lautém.

Serimónia entrega Ekipamentu no husik lenuk-oan hirak ne’e hosi Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, ho Ministru Agrikultura, Pekuária, Peskas no Florestas, Eng. Marcos da Cruz.

Iha okaziaun ne’e, Sekretáriu Estadu Peskas, hateten atividade ida ne’e nu’udar parte husi esforsu Governu atu apoia no reforsa kapasidade peskadór sira iha komunidade tasi nian.

“Apoia cool box ne’e importante tebes atu ajuda peskadór sira rai di’ak liu tan ikan sira ne’ebé hetan husi tasi, atu nune’e bele mantein kualidade ikan no fasilita prosesu fa’an iha merkadu”.

Nia afirma, Governu liuhusi Sekretaria Estadu Peskas kontinua buka dalan atu hasa’e produsaun peskas no mellora moris peskadór sira iha área kosteira.

Ikus, Sekretaria Estadu Peskas espera katak apoiu ida ne’e bele motiva peskadór sira atu kontinua halo atividade peskas ho di’ak, sustentavel no kontribui ba seguransa alimentár iha Timor-Leste.

Alende ne’e, Sekretáriu Estadu Peskas, mós ho Ministru Agrikultura, Pekuária, Peskas no Florestas (MAPF), ho tékniku Diresaun Jerál Peskas, Akuakultura no Rekursus Mariñu hamutuk ho Autoridade Lokál, Autoridade Seguransa no komunidade, realiza atividade husik lenuk-oan iha Suku Com, Postu Administrativu Lautém, Munisípiu Lautém.

Atividade ne’e hanesan parte husi esforsu Governu atu promove konservasaun rekursu tasi no proteje biodiversidade marinha, iha Timor-Leste.