18-03-2026.

FILIPINA: Vise-Primeiru Ministru, Ministru Kordenador ba Assuntu Sosiais, Eng. Mariano ASSANAMI Sabino, enkontru ho Prezidente Banku Dezenvolvimentu, Masato Kanda, hodi reforsa koperasaun servisu ne’ebe durante la’o ona liu-liu iha area edukasaun, formasaun profisionál no dezenvolvimentu kapasidade, enkontru ne’e realiza hafoin partisipa Fórum Sistema Alimentar Ásia no Pasífiku 2026, ne’ebe realiza iha Filipina.

Durante reuniaun ne’e, destaka importánsia istórika hosi adezaun Timor-Leste ba Asosiasaun Nasaun Sira Sudeste Asiátiku (ASEAN), ne’ebé konsidera hanesan marka estratéjiku ida ba país. Vise-Primeiru Ministru subliña katak integrasaun rejional ida-ne’e reprezenta oportunidade úniku ida atu aselera dezenvolvimentu ekonómiku, fortalese kooperasaun rejional no prepara Timor-Leste atu asume Prezidénsia ASEAN iha tinan 2029.

Diskusaun ne’e mos foka ba papel fundamental juventude timoroan iha futuru nasaun nian. Enfatiza nesesidade atu promove setor privadu ida ne’ebé dinámiku no inkluzivu, ne’ebé bele kria servisu dignu ba jerasaun foun sira no kontribui ba estabilidade sosial iha tempu naruk. Iha kontestu ida-ne’e, rekoñese apoiu kontinuu husi Banku Asiátiku Dezenvolvimentu, liu-liu iha área edukasaun, formasaun profisionál no dezenvolvimentu kapasidade.

Enkontru ne’e mos reafirma kompromisu konjuntu atu kombate pobreza no mal-nutrisaun. Transformasaun sistema alimentar no fortalese seguransa alimentar identifika hanesan prioridade esensiál ba progresu sustentável país nian. Masato Kanda reafirma nia protidaun atu apoiu Timor-Leste liu hosi konsellu polítika no fortalese kapasidade institusionál.

Vise-Primeiru Ministru reafirma kompromisu Governu nian atu servisu hamutuk ho parseiru dezenvolvimentu sira ho objetivu atu hari’i futuru ida ne’ebé reziliente liu, inkluzivu no prósperu ba timoroan hotu-hotu.

=====