Viqueque 07 Marsu 2026 - Ministériu Edukasaun Liuhosi Prezidente INFORDEPE Sr. Domingos Matrins hamutuk ho Xefe Inspesaun Jerál Sr. Rodolfo Henrique Aparicio, Partisipa Iha Apresiasaun No Tranzisaun Programa Apoiu Lideransa, Manorin no Aprendizajen ALMA.

Iha Intervensaun Prezidente INFORDEPE Sr. Domingos Matrins iha Serimónia Apresiasaun no Tranzisaun ne’e hala’o hodi fó rekoñesimentu ba servisu hamutuk ne’ebé mak durante ne’e foka ba dezenvolvimentu kualidade edukasaun iha munisipiu Viqueque, liuhosi kapasitasaun ne’ebé relevante ho kualifikasaun profesór siranian ne’ebé hala’o ona.

“Ohin ita Koalia kona-ba Atinzimentu no Transisaun Bainhira ita haree ba Atinzimentu ne’ebé mak atinji ona iha aprezentasaun ne’ebé furak los, signifika iha mudansa buat balun, depois de Formasaun Lideransa diretor eskola, Kordenador no Arjuntu sira. Agradese ba Programa ALMA ne’ebé mak bele kapasita ona Profesores sira Purbolta de 900 no professores sira ne’e transmite ona ba Estudante hamutuk 18.000, tanba ne’e buat kmanek no buat kmok sira ne’e ita hala’o ona, ita la konta maibé natureza Viqueque konta hela katak barak ka oituan Diretor/a sira, Arjuntu, kordenador no Feto-Potensial Kontribui ona ba prosesu Edukasaun liu-liu iha munisípiu Viqueque”. Dehan Prezidente INFORDEPE.

Entertantu Prezidente Autoridade Munisípiu Viqueque Sr. Francisco C. S. de Gonzaga Soraes hato’o Benvindu no Agradese ba Prezensa edukasaun, tanba liu husi Prezansa Edukasaun bele lori Dezenvolvimentu Edukasaun iha Munisípiu Viqueque.

“Lori Munisípiu Viqueque hato’o agradese wain ba serbisu ekipa Ministériu Edukasaun, munisípiu Viqueque prontu atu kolabora no simu ba ita nia oan sira nia interese, tanba ho edukasaun nia prezensa lori ona naroman ba ita nia oan sira no mós futuru Viqueque ninian.” Tenik PAM Viqueque.

Tranzisaun ne’e la’os de’it entrega responsabilidade, maibé mós asegura katak valór no koñesimentu ne'ebé hetan ona sei kontinua fó benefísiu ba setór edukasaun, Durante ezekusaun programa ALMA fó ona kontribuisaun signifikativu, liuliu iha formasaun no akompañamentu ne'ebé ajuda hadi'a kualidade aprendizajen iha eskola sira.

Iha serimonia apresiasaun no tranzisaun programa ALMA ne’e entrega mós sertifikadu rekoñesimentu ba dirijente eskola no profesór sira ne’ebé partisipa ona iha formasaun durante períodu implementasaun programa nian.

#jornalistaabel

#MédiaME