Dili, 18 Marsu 2026; Vise-Ministru Fortalesimentu Institusionál Saúde (VMFIS) Sr. José dos Reis Magno no Vise Ministru ba Operasionalizasaun Ospital, dr. Flavio Brandão Mendes de Araújo, akompaña hosi Kuadru Ezekutivu Ministeriu Saúde halo Audiensia públika ho Komisaun F Parlamentu Nasionál hodi ko'alia kona-ba Ezekusaun Orsamentál no dezempeñu 4⁰ trimestre Orsamentu Gerál Estadu (OGE) 2025, iha sala prenária Parlamentu Nasionál.

Iha Intervensaun VMFIS agradese ba oportunidade ne’ebe fó ba Ministeriu Saúde mai aprezenta situasaun servisu no situasaun ezekusaun Orsamentu Jeral Estadu tinan fiskal 2025. Konstutuisaun Repúblika Democrática Timor-Leste, saúde konsidera nu'udar direitu fundamental ba kada sidadaun estadu iha responsabilidade atu promove no garante sistema nasionál saúde ne’ebe universal, inkluzivu no asesível ba populasaun tomak.

Iha âmbito IX-Governo Konstitusionál, Ministériu Saúde konsidera nu'udar setór prioritáriu ida hafoin Ministérius Edukasaun no Agrikultura, ho objetivu atu mellora prestasaun servisus saúde ba populasaun Timor-Leste tomak.

Maibe, atu alkansa objetivu sira ne’e, sei nesesáriu laos deit rekursus finanseirus, maibe presiza rekursus humanus kualifikadus, ekipamentus adekuadus no infraestruturas saúde ne’ebe sufisiente.

Alokasaun Orsamentu Jeral Estadu 2025 Iha tinan fiskal 2025, Ministériu Saúde simu dotasaun orsamental total US$ 73.931.148, inklui US$ 5,9 milhões husi Direct Budget Support (DBS).

Atu mos hato’o katak montante osan hanesan hato’o la-inklui Orsamentu ba Entidades autónomas, hanesan Serviso nasional de Ambulância e Emergência Médica, Instituto Nasionál Saúde Públika Timor-Leste, Institutu Nasionál Farmásia no Produtu Médika, Hospital Nasionál Guido Valadares.

Iha Kuartu trimestre tinan 2025 Governu disponibiliza tan Orsamentu adisional ho montante US$ 10.030.000 ba iha kategoria Transferênsias Públikas, destinadu atu selu dívidas ne’ebe iha relasaun ba tratamentu pasientes ne’ebe refere ba hospitais iha estranjeiru.

Nune’e, total Orsamentu alokadu ba Ministériu Saúde iha 2025 atinji ba US$ 83.961.148, ne’ebe mos reprezenta 4,7% husi total despezas Orsamentu Jeral Estadu, ho estimasaun US$ 1,8 mil milhões, iha 2025 nian.