Asuntu : 𝐓𝐢𝐦𝐨𝐫-𝐋𝐞𝐬𝐭𝐞 𝐬𝐚𝐢 "𝐁𝐞𝐬𝐭 𝐨𝐟 𝐓𝐡𝐞 𝐍𝐚𝐭𝐢𝐨𝐧𝐬" 𝐢𝐡𝐚 𝐤𝐨𝐦𝐩𝐞𝐭𝐢𝐬𝐚𝐮𝐧 𝐖𝐨𝐫𝐥𝐝𝐒𝐤𝐢𝐥𝐥𝐬 𝐀𝐒𝐄𝐀𝐍 𝟐𝟎𝟐𝟓 𝐢𝐡𝐚 𝐌𝐚𝐧𝐢𝐥𝐚 𝟎𝟗 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓 ============== Vise-Primeiru-Ministru, Ministru Koordenadór Asuntu Ekonómiku (MKAE), no Ministru Turizmu no Ambiente (MTA), Dato’ Seri Francisco Kalbuadi Lay, apresia no orgullu ba kontijente Timor-Leste ne’ebé ba dahuluk tuir kompetisaun 𝐖𝐨𝐫𝐥𝐝𝐒𝐤𝐢𝐥𝐥𝐬 𝐀𝐒𝐄𝐀𝐍 ba dala 14 iha Manila-Filipina, basá iha kompetisaun ne’e Timor-Leste sai "𝐁𝐞𝐬𝐭 𝐨𝐟 𝐓𝐡𝐞 𝐍𝐚𝐭𝐢𝐨𝐧𝐬" iha parte kulinária nian. Vise-PM fó Parabens ba ekipa no ba kompetidóra Ester Araújo Pinheiro, ne’ebé sai nu’udar “𝐁𝐞𝐬𝐭 𝐍𝐚𝐭𝐢𝐨𝐧 𝐀𝐰𝐚𝐫𝐝𝐢𝐧𝐠 𝐨𝐟 𝐓𝐢𝐦𝐨𝐫-𝐋𝐞𝐬𝐭𝐞,” ida ne’e sai hanesan motivasaun bo’ot ida ba imi no Timoroan hotu. “𝐏𝐚𝐫𝐚𝐛𝐞𝐧𝐬 𝐛𝐚 𝐢𝐦𝐢, 𝐧𝐨 𝐓𝐢𝐦𝐨𝐫𝐨𝐚𝐧 𝐡𝐨𝐭𝐮,’’𝐡𝐚𝐭𝐞𝐭𝐞 𝐕𝐢𝐬𝐞-𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮 𝐡𝐚𝐟𝐨𝐢𝐧 𝐞𝐤𝐢𝐩𝐚 𝐝𝐞𝐥𝐞𝐠𝐚𝐬𝐚𝐮𝐧 𝐓𝐢𝐦𝐨𝐫-𝐋𝐞𝐬𝐭𝐞 𝐡𝐚𝐟𝐨𝐢𝐧 𝐡𝐚𝐬𝐨𝐫𝐮 𝐦𝐚𝐥𝐮 𝐢𝐡𝐚 𝐆𝐚𝐛𝐢𝐧𝐞𝐭𝐞 𝐅𝐚𝐫ó𝐥-𝐃𝐢𝐥𝐢, 𝐒𝐞𝐠𝐮𝐧𝐝𝐚, 𝟎𝟖 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓. Ekipa ne’ebélidera husi Diretora Instituto Nacional de Desenvolvimento de Mão-de-Obra, Instituto Público (INDMO,IP), Isabel Fernandes de Lima, akompañadu husi Tékniku Espesialista INDMO,IP, expertu no kompetidór sira hasoru malu ho Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Dato’ Seri Francisco Kalbuadi Lay hodi hato’o agradesimentu ba apoiu tomak husi Vise-Primeiru-Ministru durante partisipasaun Timor-Leste nian iha kompetisaun WorldSkills ASEAN iha Filipina. Diretora INDMO,I.P, Isabel Fernandes de Lima katak, kompetisaun WorldSkills ASEAN ne’e halo dala ida iha tinan rua nia laran. No Timor-Leste ba iha ne’eba tanba aprende lobuk ida husi sentru treinamentu sira ne’ebé akreditadu iha rai-laran no sira aprezenta sira-nia dezempeñu ho di’ak loos. Timor-Leste hetan konvite husi worldskills ASEAN 2025, no ba dahuluk partisipa iha worldskills ASEAN ne’e. Timor-Leste tuir kompetisaun ne’e lori kompetidór na’in tolu ba cooking, restaurant services no mós welding nian, ao mesmo tempu iha mós expertu juri sira, tanba Timoroan nain tolu mos envolve hanesan juri ba iha kompetisaun ne’e. “Kompetisaun ne’e, Timor-Leste hetan valor ne’ebé a’as nune’e sira ne’ebé mak hanesan head of delegations, ami kuaze nasaun hamutuk 10, ami na’in hira vota ba iha kada nasaun ema ida, tantu husi Timor-Leste, Ester Araújo Pinheiro mak hetan hanesan Best of the nations,’’esplika Diretora INDMO. Vensedora ba kompetisaun WorldSkills ASEAN 2025 iha parte kulinária, Ester Araújo Pinheiro, sente orgullu tanba reprezenta Timor-Leste partisipa iha kompetisaun ne’e. “Ne’e aumenta tan ha’u-nia skills foun no mós ajuda ha’u atu iha kompetisaun tuir mai ha’u mós bele aprende liu tan no mós hadi’a ha’u-nia skill di’ak liu tan." Partisipasaun ida-ne'e koordena husi INDMO, I.P, no Timor-Leste partisipa iha kategoria abilidade tolu hanesan Cooking ho nia konkorente husi Sentru Treinamentu Vokasional Juventude-Comoro (Ester Araújo Pinheiro), Restaurant Service ho nia konkorente husi DIT (Nenilton André de Sousa) no Welding ka Soldadura husi Centro Nacional Emprego Formação Profissional – Tibar (Fidencio das Neves). Timor-Leste nia partisipasaun ba dahuluk iha kompetisaun rejionál ida ne’e maske la lori fila medalla ruma, maibe liuhusi kompetisaun ne’e bele hametin lasu amizade entre nasaun sudeste aziátiku sira. Kompetisaun ASEAN ne’e hala’o iha World Trade Centre Manila durante loron tolu, partisipa husi nasaun membru ASEAN sira.
Data Publica : 09 Sep 2025
Descrisaun :
