Dili, 19 Marsu 2026 – Sua Exelénsia Ministru Juventude, Desportu, Arte no Kultura (MJDAK), Sr. Nelyo Isaac Sarmento, lidera Reuniaun Dahuluk Komisaun Nasionál Desportu (KND) nian iha tinan 2026, ne’ebé hala’o iha Sala Magna MJDAK, Lecidere.

Sorumutu ne’e foka liu ba ajenda estratéjika hodi dezenvolve kualidade kordenasaun desportu nasionál, liuliu:

Reformulasaun Baze Legál: KND hamutuk ho Konfederasaun Desportu Timor-Leste (CDTL) kordena hela hodi halo revizaun ba leis sira ne'ebé reforsa servisu Komisaun nian. Meta prinsipál mak kria diploma legál ne'ebé sai baze fundamentál ba Governu hodi regula rekonesimentu ba prestasaun atleta sira nian iha nível internasionál.

Avaliasaun SEA Games 2025: Diskusaun mós kobre kona-ba prestasaun atleta sira nian iha SEA Games Tailándia 2025. Governu kontinua fó atensaun hodi avalia oinsá bele motiva nafatin ita-nia atleta no treinadór sira hodi kontinua foti aas naran Timor-Leste.

Iha biban ne'e, KND mós haree kona-ba planu atribuisaun prémiu ba atleta sira ne’ebé konsege lori medalla, nu'udar parte husi polítika motivasaun nian. Prosesu ida-ne’e sei la’o tuir prosedimentu administrativu no baze legál ne'ebé foin mak diskute hela, hodi asegura katak rekonesimentu Estadu nian ba atleta sira la'ó ho transparénsia no tuir regra ne'ebé vigór.

Sorumutu ne'e partisipa husi Prezidente CDTL, Sr. Afranio Xavier, Sekretáriu Ezekutivu KND, Diretór Jerál Desportu, no Komisáriu KND sira.

#MJDAK #KND #DesportuTL #ReformaLeis #SEAGames2025 #TimorLeste #NelyoIsaacSarmento #MídiaMJDAK