𝗟𝗮𝘂𝘁𝗲́𝗺, 𝟭𝟲 𝗠𝗮𝗿𝘀𝘂 𝟮𝟬𝟮𝟲

Ministru Obras Públikas, Samuel Marçal iha loron segunda-feira ne’e hamutuk ho membru Governu balun akompaña Primeiru-Ministru (PM) Kay Rala Xanana Gusmão hala'o vizita servisu bá Munisípiu, hodi "haree besik servisu munisipál husi rezultadu avaliasaun kondisaun mínima" antes Munisípiu Lautém simu desentralizasaun administrativa no eleisaun bá Kámara Munisipál ne'ebé planeia atu akontese iha tinan 2027.

Vizita ne'e halo parte husi faze datoluk programa monitorizasaun nasionál nian hodi prepara administrasaun munisipál sira simu desentralizasaun administrativa no eleisaun bá Kámara Munisipál ne'ebé planeia atu akontese iha tinan 2027, pontu importante husi atividade ne'e mak; PM Xanana halo avaliasaun diretamente nivel kbiit servisu munisipál sira, inklui rekursu umanu no infraestrutura, hodi asegura katak sira prontu atu asume kompeténsia foun.

Iha vizita ne’e mós PM Xanana uza oportunidade halo mós diálogu ho autoridade munisipál, lokál, diretór servisu sira, veteranu no emprezáriu lokál iha Jinájiu Lospalos Vila hodi identifika prioridade dezenvolvimentu nian.

Alende ne’e Xefe Governu inaugural mós edifísiu foun balun hodi haforsa prestasaun servisu públiku iha Lautém.

Hafoin remata iha Lautém, PM Xanana no nia delegasaun kontinua kedan viajen bá Munisípiu Baucau hodi hala'o atividade hanesan iha loron 17 Marsu 2026.

https://sdi.gov.tl/ministerio/presrealease/create 

*𝗠𝗶́𝗱𝗶𝗮-𝗠𝗢𝗣*