Lautém, 16 Marsu 2026 – 𝐄𝐱𝐜𝐞𝐥𝐞̂𝐧𝐜𝐢𝐚 𝐒𝐞𝐜𝐫𝐞𝐭𝐚́𝐫𝐢𝐨 𝐝𝐞 𝐄𝐬𝐭𝐚𝐝𝐨 𝐝𝐚𝐬 𝐅𝐥𝐨𝐫𝐞𝐬𝐭𝐚𝐬 𝐄𝐧𝐠. 𝐅𝐞𝐫𝐧𝐚𝐧𝐝𝐢𝐧𝐨 𝐕𝐢𝐞𝐢𝐫𝐚 𝐝𝐚 𝐂𝐨𝐬𝐭𝐚, 𝐒.𝐇𝐮𝐭, partisipa iha diálogu ne’ebé lidera husi Primeiru-Ministru Kay Rala Xanana Gusmão ho intelektuais sira iha Munisípiu Lautém, hodi haree besik servisu munisipál sira bazeia ba rezultadu avaliasaun kondisaun mínima ne’ebé realiza husi Ministériu Administrasaun Estatal.

Diálogu ne’e hala’o iha Lospalos, iha Munisípiu Lautém, nu’udar parte husi preparasaun Governu Konstitusionál ba implementasaun polítika Desentralizasaun Administrativa no Poder Lokál. Tuir planu Governu, iha tinan 2027 sei transfere poder no responsabilidade husi Governu Sentrál ba nivel lokál, atu nune’e povu bele partisipa diretamente iha prosesu governasaun no dezenvolvimentu.

Primeiru-Ministru Kay Rala Xanana Gusmão mos akompaña husi Ministru Administrasaun Estatal Tomás do Rosário Cabral, Ministru Planeamentu no Investimentu Estratéjiku Gastão de Sousa, no Ministru Obras Públikas Samuel Marçal.

Programa diálogu ne’e hala’o iha Ginásio Munisipál Lautém ho tema “Haree Besik Servisu Munisipál Hosi Rezultadu Avaliasaun Kondisaun Mínima.” Iha programa ne’e, Prezidente Autoridade Munisipál Lautém Mélio de Jesus aprezenta perfil munisípiu, vizaun no misaun, planu estratéjiku munisipál 2026–2030, no estrutura funsionamentu autoridade munisipál.

Iha nia intervensaun, Primeiru-Ministru Kay Rala Xanana Gusmão hateten katak povu iha Munisípiu Lautém tenki prepara-an ho hanoin ida de’it atu dezenvolve sira nia munisípiu. Nia mos husu ba lideransa no komunidade sira atu evita hahalok hanesan familiarismu, sukuismu no partidarismu iha prosesu dezenvolvimentu, atu nune’e fokus ba progresu no futuru Munisípiu Lautém.

Iha intervista ida, Prezidente Autoridade Munisipál Lautém Mélio de Jesus hateten katak avaliasaun kondisaun mínima ne’ebé hala’o husi Ministériu Administrasaun Estatal iha tinan kotuk hatudu katak Munisípiu Lautém hetan rezultadu “muito melhor.”

Nia esplika katak avaliasaun ne’e bazeia ba fator sira hanesan planeamentu, finansas, aprovizionamentu no rekursu umanu. Hosi pontu ne’ebé komisaun atribui, Munisípiu Lautém hetan valor total 180 pontu, ne’ebé tama iha kategoria muito melhor.

Atividade diálogu ne’e mos partisipa husi membru Parlamentu Nasionál, ministru no vise-ministru sira, sekretáriu estadu sira, lider relijiozu sira, administradores postu administrativu, lider komunitária sira, veteranos, Polísia Nasionál Timor-Leste (PNTL), sosiedade sivíl, estudantes no partisipantes seluk.