Steering Committee ne’e hanesan plataforma ida iha nível aas atu hametin koordenasaun no supervízaun estratéjika ba investimentu prinsipál sira iha área mobilidade traballu no dezenvolvimentu kualifikasaun. Mecanizmu ida-ne’e dezena atu asegura aliñamentu entre apoiu Austrália nian ho prioridade nasionál SEFOPE nian, no mós atu fasilita diálogu polítika no kooperasaun iha setór importante sira.

Iha sesaun ne’e, Sua Exelénsia Sekretáriu Estadu hatete ho apresiasaun: “Ha’u hakarak hatudu ha’u-nia apresiasaun ba Governu Timor-Leste nia kolaborasaun forte ne’ebé kontinua ho Governu Austrália. Parseria ida-ne’e refleta ita-nia kompromisu hamutuk atu alkansa rezultadu ne’ebé signifikativu no sustentável, ne’ebé lori benefísiu ba tempu naruk ba nasaun rua, liuhusi inisiativa mobilidade traballu no kualifikasaun sira."

Iha ninia diskursu abertura, Sua Exelénsia Embaixadora Wilson subliña kompromisu Austrália nian, hodi dehan: "Austrália kontente tebes atu hamutuk ho Governu Timor-Leste iha lansamentu Steering Committee ba Mobilidade Laboral no Kualifikasaun ida-ne’e. Mecanizmu ida-ne’e marka pájina foun ida iha komponente importante husi ita-nia relasaun bilaterál. Aleinde enkontru ohin ne’e, ita hein ho esperansa ba kolaborasaun no kooperasaun forte ne’ebé kontinua entre ita-nia governu rua."

Estabelesimentu Steering Committee ida ne’e marka faze importante iha parséria Austrália-Timor-Leste, hodi reforsa kompromisu konjuntu nasaun rua nian atu hasa’e mobilidade traballu no dezenvolvimentu kualifikasaun atu bele atinji prosperidade mútua.