𝗗Í𝗟𝗜, 𝗠𝗝 — 𝗞𝘂𝗮𝗿𝘁𝗮-𝗳𝗲𝗶𝗿𝗮 𝟭𝟴 𝗠𝗮𝗿𝘀𝘂 𝟮𝟬𝟮𝟲, Sua-Eselénsia Ministru Justisa Dr. Sérgio de Jesus Fernandes da Costa Hornai hola parte iha reuniaun Konsellu Ministrus ne’ebé lidera hosi Sua-Eselénsia Primeiru Ministru (PM), Kay Rala Xanana Gusmão, ne’ebé realiza iha sala sorumutu Prezidénsia Konsellu Ministrus, Palásiu Governu, Díli.

Konsellu Ministrus analiza konkluzaun ba auditoria forense ne’ebé hala’o husi EY Portugal kona-ba prosesu akizisaun no jestaun aviaun Twin Otter no mós konstrusaun ró Haksolok, ne’ebé hala’o husi Autoridade Rejiaun Administrativa Espesiál Oekusi Ambenu.

EY Portugal halo parte iha rede internasionál Ernst & Young, organizasaun servisu profisionál ida ne’ebé boot liu iha mundu, ho esperiénsia hodi hala’o auditoria ba entidade públika no privada sira.

Durante sorumutu, aprezenta deskrisaun ida kona-ba prosesu akizisaun, jestaun no konstrusaun ba ekipamentu sira ne'ebé temi ona, no mós konkluzaun prinsipál sira hosi auditoria forense.

****

Vise-Ministra ba Asuntus ASEAN mós halo aprezentasaun ida kona-ba kalendáriu reuniaun ASEAN nian ne’ebé Timor-Leste sei partisipa iha fulan-marsu no fulan-abríl tinan 2026.

Governante ne’e aprezenta ona objetivu prinsipál sira husi partisipasaun sira-ne’e, liu-liu reforsu kooperasaun rejionál, hametin parserias estratéjikuas no konsolidasaun prezensa Timor-Leste nian iha mekanizmu koordenasaun polítika, ekonómika, no seguransa ASEAN.

****

Tuir proposta sira ne’ebé aprezenta hosi Ministra Edukasaun, Dulce de Jesus Soares, Konsellu Ministrus delibera hodi aprova tema “Edukasaun, valór demokrátiku sira no partisipasaun sívika: dalan sira atu hametin sosiedades CPLP” ba Reuniaun Ministrus Edukasaun Komunidade País Lian Portugés (CPLP, sigla iha lian portugés) nian, ne’ebé sei hala’o iha Dili, loron 7 fulan-maiu tinan 2026. Sorumutu ida-ne’e nu’udar espasu konsertasaun ida entre Estadu-Membru sira hodi hametin kooperasaun iha área edukasaun nian, aliña pozisaun iha forum internasionál sira no akompaña implementasaun inisiativas konjuntas iha setór ne’e.

𝗥𝗘𝗠𝗔𝗧𝗔