𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮 𝟭𝟯 𝗠𝗮𝗿𝘀𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai nu’udár Prezidente Konsellu Jerál prezide reuniaun Konsellu Jeral Centro de Formação Jurídica e Judiciária (CFJJ sigla portugés), ho objetivu hodi hola desijaun estratejiku ba atividade formasaun iha CFJJ.

Iha okaziaun reuniaun Konsellu Jerál ne’e realiza iha Sala Sorumutu Ministériu Justisa, Colmera, Díli. Iha biban ne’e, Konsellu Jerál halo deliberasaun no aprova abertura VIII Kursu Formasaun ba Juíz, Prokuradór no Defensór Públiku, ho total kandidatu hamutuk 36 formandus.

Iha oportunidade ne’e mós, Konsellu Jerál halo deliberasaun kona-ba organizasaun no implementasaun programa formasaun sira seluk ne’ebé sei realiza hosi Centro de Formação Jurídica e Judiciária (CFJJ). Programa hirak ne’e, inklui formasaun iha área direitu, área linguístika, realizasaun semináriu akadémiku sira, no mós formasaun espesífika ba profisionál sira iha área notariadu no konservatória.

Iha okaziaun ne’e, partisipa másimu hosi membru Konsellu Jeral CFJJ, dirijente institusionál relevante sira hanesan; Prezidente Tribunál Rekursu, Dr. Afonso Carmona, Prokuradór Jeral Repúblika, Dr. Nelson de Carvalho, Prezidente do Conselho Gestao no diciplina advokasia atual Diretór Jeral Politika Justisa, Dr. Nelinho Vital, Defensor Públiku Jerál, Dr. Câncio Xavier no Diretór Nasionál CFJJ, Dr. Francisco Xavier Vasco Soares.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #