𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟭𝟯 𝗠𝗮𝗿𝘀𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai, simu Delegasaun hosi Uniaun Europeia (UE) iha enkontru ida iha Ministériu Justisa, Dili, ho objetivu atu reforsa kooperasaun entre Governu Timor-Leste no Uniaun Europeia iha área justisa no estadu direitu, iha sala Ministériu Justisa, Colmera, Díli.

Objetivu hosi enkontru ne’e, atu diskute no hametin apoiu hosi Delegasaun Uniaun Europeia (UE) ba Governu Timor-Leste, liuliu iha esforsu atu dezenvolve no moderniza sistema digitalizasaun setor justisa. Iha kontestu ida ne’e, Delegasaun UE manifesta nia disponibilidade atu fó suporta finansial ho montante 6 milhões euros, atu apoia implementasaun sistema dizitalizasaun iha setor justisa iha Timor-Leste. Projecto ida ne sei implementa husi Portugal, Itália no Lituânia.

Ministru Justisa hateten, Ministériu Justisa kontinua buka oportunidade atu hametin parseria ho Uniaun Europeia hodi garante implementasaun programa sira ne’ebé fó kontribuisaun ba modernizasaun sistema digitalizsaun justisa, asesu justisa ba sidadaun sira no konsolidasaun estadu direitu demokrátiku iha Timor-Leste, hanesan parte ida ba implementasaun Programa IX Governo Constitucional kona-bá governu elektróniku.

Delegasaun Uniaun Europeia iha enkontru ne’e reafirma nia kompromisu atu kontinua apoiu esforsu Governu Timor-Leste, partikularmente iha área reforma setor justisa, fortalese transparénsia institusionál no promosaun estadu direitu.

Enkontru ne’e realiza iha ambiente konstrutivu no mos sai hanesan oportunidade importante atu troka hanoin kona-ba prioridade sira iha setor justisa no identifika área sira ba kooperasaun iha futuru, liu-liu konaba digitalização iha setor justisa.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #