𝗢𝗕𝗢𝗡𝗔𝗥𝗢, 𝗠𝗝 — 𝗞𝗶𝗻𝘁𝗮-𝗳𝗲𝗶𝗿𝗮, 𝟭𝟮 𝗠𝗮𝗿𝘀𝘂 𝟮𝟬𝟮𝟲, Governu liuhosi Sua-Eselénsia Ministru Justisa, Dr. Sérgio de Jesus Fernandes da Costa Hornai, hamutuk ho Sua-Eselénsia Ministru Administrasaun Estatál (MAE), Tomás do Rosário Cabral, no mós hosi Sua-Eselénsia Primeiru-Ministru, Kay Rala Xanana Gusmão, no Reprezentante Programa Nasoens Unidas ba Dezenvolvimentu (PNUD), Katyna Argueta, hala’o serimónia inaugurasaun edifísiu Balkáun Úniku (BU) iha Postu Administrativu Maliana, Munisípiu Bobonaro.

Serimónia inaugurasaun ne’e, sai hanesan momentu importante ida iha esforsu Governu atu reforsa prestasaun servisu públiku ba sidadaun sira. Ho inaugurasaun edifísiu Balkáun Úniku ne’e, komunidade iha Maliana no área sira besik bele asesu liu fasil no efisiente ba servisu administrativu no rejistu sira ne’ebé liga ho Ministériu Justisa.

Inisiativa ida-ne’e mós refleta kooperasaun di’ak entre Governu Timor-Leste no PNUD iha apoiu ba modernizasaun servisu públiku, ho objetivu atu aproxima servisu governamentál ba povu no hadia kualidade atendimentu institusionál iha nível lokál.

Governu hein katak, ho funsionamentu Balkáun Úniku iha Maliana, bele fasilita liu tan prosesu administrativu sira no kontribui ba dezenvolvimentu servisu justisa ne’ebé asesível, transparante no efisiente ba sidadaun hotu.

Balkaun Úniku ne'e estabelese bá da-siak iha territóriu, liu-liu iha Bobonaro neʼebé mai ho ekipamentu foun no lori servisu governamentál sira atu trata Billete Identidade (BI), Pasaporte, no Sertidaun Kriminál hodi hamenus tempu, kustu no todan bá viazen sidadaun sira ne'ebé hela do’ok hosi kapitál. Balkaun Úniku maka sistema ida integradu, servisu hamutuk ho liña ministeriál sira liu-liu Ministériu Justisa.

Prosesu pasaporte halo iha Balkaun Úniku ne’e, maibé imprime iha Dili tanba Pasaporte hanesan dokumentu ida ofisiál tebtebes, nia sentrál iha Serve ne’ebé iha Ministériu Justisa. Maibé dokumentu seluk prodús iha Balkaun Úniku.

Servisu ne’e hetan apoiu mós hosi Ministériu Transporte no Komunikasaun (MTK) tanba prosesu sira ne’e tomak presiza internet. Alende ne’e servisu hamutuk mós ho Programa Nasaun Unidas bá Dezenvolvimentu (PNUD) desde tinan 2023.