Dili, loron 19 marsu 2026 - Ministériu Edukasaun liuhusi Sua Exelénsia Ministra Edukasaun Dra.Dulce de Jesus Soares no akompaña husi Vise-Ministra Finansas Sra. Regina de Jesus de Sousa simu ekipamentu no materiál mobiliáriu sira husi Governu Estadus Unidus liuhusi MCC, iha sala konferénsia Ministériu Edukasaun Vila-Verde.

Iha Diskursu Sua Exelénsia Ministra Edukasaun Dra.Dulce de Jesus Soares hatete, dezde tinan hirak ona Estadus Unidus Amérika sai parseiru ne’ebé laran-metin ba Ministériu Edukasaun. Sira apoia Ministériu nia esforsu ba kurríkulu iha nível hotu-hotu liuhusi atividade oioin, hanesan sosa instrumentu tradisionál ba eskola sira atu hala’o lisaun arte no kultura, to’o haruka Espesialista Lia-Inglés ida mai hodi hakerek ita-nia kurríkulu Inglés no fó formasaun ba profesór Inglés sira iha klase 7 to'o 9.

"Foin lalais ne’e mós, ami rona katak Governu Amérika sei ajuda liután iha kestaun infraestrutura eskola nian no ami hahú projetu MCC ho esperansa boot, tanba ninia alvu mak ensinu sekundáriu.

Setór ida-ne’ebé susar atu atrai doadór sira, maibé importante tebes ba dezenvolvimentu ekonómiku no forsa de traballu iha ita-nia rain. Tan ne’e, loos-duni, hanesan Ministra Edukasaun, ha’u triste tanba projetu ida-ne’e sei la kontinua", SE Ministra Esplika.

Governante ne'e aprofunda, ministériu nafatin iha esperansa, no fiar katak sei kontinua hametin parseria ho Governu Amérika liuhusi dalan seluk ne’ebé benefisiozu no fiar katak sei kontinua hametin kualidade ensinu sekundáriu no tékniku-vokasionál nian, liuhusi reforma kurríkulu, fornese ekipamentu, no formasaun ba profesór sira.

"Ha’u komprende katak ohin entrega mai ami mobiliáriu ba eskola no eskritóriu, no ha’u bele hatete sinseramente katak oras ne’e dadauk ami simu ona pedidu barak ba mobiliáriu eskola sekundária nian, tan ne’e sasán sira-ne’e sei fahe kedas ho lalais. Ekipamentu IT no komputadór mós presiza tebes iha nivel hotu hotu husi nivel nasionál to’o eskola", tenik SE Ministra.

Ministériu no INFORDEPE ne’ebé sei simu mobiliáriu no ekipamentu sira-ne’e, atu garante sira-nia manutensaun no kuidadu ho didi’ak sasán ne’e la’ós prezente, maibé instrumentu esensiál atu ajuda ita foti sa’e kualidade ensinu-aprendizajen, hadi’ak kualidade profesór nian, no fó apoiu esensiál ba nivel ensinu sekundáriu no tékniku-vokasionál. Imi sei la simu tan buat seluk se la fó kuidadu buat ne’ebé iha ona

#VERSÃO EM #PORTUGUÊS