𝐃Í𝐋𝐈-𝐒𝐞𝐠𝐮𝐧𝐝𝐚 𝟐𝟑/𝟎𝟑/𝟐𝟎𝟐𝟔,

Ministériu Finansas liuhusi Diresaun Jerál Servisu Korporativu, Diresaun Nasionál Rekursu Umanu hamutuk ho Unidade Apoiu Jurídiku halo sosializasaun ba funsionáriu kontratadu termu sertu iha Ministériu Finansas relativamente ho Dekretu Lei No.3/2026, 3 Fevereiru kona-ba “Rejime Jurídiku Kontratus Traballu Termu Sertu iha Administrasaun Públika.”

Rejime Jurídiku Kontratus Traballu Termu Sertu aplika ba funsionáriu kontratadu sira ne’ebé serbisu iha administrasaun públika inklui membru gabinete ministeriál. Sira ne’ebé la sujeitu ba rejime ida ne’e maka empreza públika, entidade administrativa sira independente ho funsaun reguladora, nomós kontratadu iha rejime espesiál.

Rejime ida ne’e aplika ba kategoria rua de’it hanesan tékniku profísionál espesializadu no tékniku espesializadu, iha rejime kontratasaun públika ida ne’e kontratu hotu ne’ebé halo ho baze ba rejime ida ne’e ho durasaun longu prazu fulan neen, kurtu prazu menus husi fulan neen. No nia masimu kontrasaun to’o de’it fulan neen nulu ka ekivale ba tinan 5, konta husi kontratu orijinál, renovasaun ba kontratu halo kada tinan labele mandate ida tomak.

Forma kontrasaun nian iha rua hanesan primeiru, halo rekrutamentu loke pozisaun ne’e públiku ema hotu konkore tuir etapa sira iha Lei ne’e to’o asinatura kontratu.

Segundu, rekrutamentu ajusta direta bazeia ba nesesidade fundamental iha kada diresaun, natureza funsaun atu rekruta altamente espesializadu no hetan autorizasaun husi superior masimu bele halo rekrutamentu esepsionál.

Remunerasaun ba kontratadu enkuadra iha kategoria tolu hanesan profísionál espesializadu, tékniku espesializadu no rejime jerál.

Atividade ne’e hala’o iha sala auditorium Ministériu Finansas Aitarak-laran, hetan prezensa masimu husi Diretór Jerál Servisu Korportativus Sr. Epifanio de Jesus Carvalho, Xefe Unidade Inspesaun Jerál Sr. Ernesto da Conceição Silva, Diretór Nasionál Rekursu Umanu Sr. Cesario Martins, inklui funsionáriu kontratadu termu sertu Ministériu Finansas ne’ebé ho totál 170 pesoas.

#Foto #Ekipa #Media #Ministeriufinansas