Asuntu : 𝐕𝐏𝐌 𝐈𝐈 𝐃𝐢𝐚́𝐥𝐨𝐠𝐮 𝐡𝐨 𝐏𝐥𝐚𝐧 𝐈𝐧𝐭𝐞𝐫𝐧𝐚𝐬𝐢𝐨𝐧𝐚́𝐥, 𝐌𝐒, 𝐧𝐨 𝐌𝐄 𝐚𝐭𝐮 𝐈𝐦𝐩𝐥𝐞𝐦𝐞𝐧𝐭𝐚 𝐏𝐨𝐥𝐢́𝐭𝐢𝐤𝐚 𝐏𝐥𝐚𝐧𝐞𝐚𝐦𝐞𝐧𝐭𝐮 𝐅𝐚𝐦𝐢𝐥𝐢𝐚́𝐫 𝐢𝐡𝐚 𝐓𝐋 Dili, 09 Setembru 2025 - Vise-Primeiru-Ministru Interinu, Sua Exelénsia Ministru Nelyo Isaac Sarmento, hanesan mós Ministru Juventude, Desportu, Arte no Kultura (MJDAK), ne’ebé reprezenta Sua Exelénsia ba Asuntu Sosiál, Mariano Asanami Sabino, partisipa iha diálogu ho Plan Internasionál, Ministériu Saúde (MS) no Ministériu Edukasaun (ME) kona-ba implementasaun polítika Planeamentu Familiár iha Timor-Leste. Atividade ne’e hala’o iha Salaun Suai Room, Timor Plaza, Dili. Iha okaziaun ne’e, VPM II Interinu, Nelyo Isaac Sarmento, hateten katak objetivu hosi diálogu ne’ebé organiza hosi Plan Internasionál mak atu diskute implementasaun polítika planeamentu familiár hamutuk ho ministériu sira ne’ebé relevante ba asuntu sosiál. Ida-ne’e atu enkoraja no fó hanoin ba sosiedade no joven sira kona-ba problema sosiál sira atu bele kontribui ba dezenvolvimentu nasionál. “Diálogu ida ohin ne’e di’ak tebes ne’ebé Plan Internasionál organiza atu diskute kona-ba implementasaun polítika planeamentu familiár. Depois ita sei haree ba rekomendasaun sira hodi Governu bele halo tuir,” VPM II Interinu dehan. Nia mós hatutan katak hanesan VPM II Interinu ba asuntu sosiál, nia iha ne’e hodi fó apoiu no hanoin Governu nian kona-ba problema ne’ebé presiza atu bele harii sosiedade ne’ebé forte. Governante ne’e esplika katak asuntu joven mak problema sosiál ida-ne’e tanba ne’e liliu liña ministeriál sira ne’ebé relevante ba asuntu ne’e sei responsavel no proativu hodi kolabora no komunika ho organizasaun joven sira. Asuntu ne’ebé sira preokupa mak planeamentu familiár atu bele hamenus problema sosiál sira, liuliu isin-rua no kaben sedu. Iha diálogu ne’e partisipa mós hosi Jerente Programa Plan Internasionál, Joanina Vitoria Ximenes, Diretora Jerál Kuidadu Saúde Primária (DGCSP), Elisabeth Leh Nau, no reprezentante husi Ministériu Edukasaun, Odelia Martins. Partisipante sira mai husi Plan Internasionál no mós husi joven universitáriu sira.
Data Publica : 10 Sep 2025
Descrisaun :
