𝗗Í𝗟𝗜, 𝗠𝗝 –𝗧𝗲𝗿𝘀𝗮-𝗙𝗲𝗶𝗿𝗮, 𝟮𝟰 𝗠𝗮𝗿𝘀𝘂 𝟮𝟬𝟮𝟲, Sua-Exelénsia Ministru Justisa, Dr. Sérgio de Jesus Fernandes da Costa Hornai, realiza reuniaun ho Komisaun ba Rekrutamentu no Selesaun Juis (KRSJ) sira Supremu Tribunál Justisa nian kompostu husi Dr. Avelino Coelho, Dra. Carmelita Moniz no Dr. José Pedro Mariano Neves Camões, iha sala reuniaun Gabinete Ministru Justisa, Ministériu Justisa, Colmera, Díli.

Objetivu husi reuniaun ne’e atu reforsa koordenasaun entre Ministériu Justisa ho KRSJ, liu-liu kona-bá preparativu nesesáriu sira ba prosesu rekrutamentu no selesaun juis sira ba ekipa juri. Prosesu tenke transparente, kredivel no tuir meritokrasia. Tuir kalendáriu, prosesu rekrutamentu no kontratasaun júri sei akontese iha fulan abril 2026 nia laran, aliña ho roteiru ba instalasaun Supremu Tribunal Justisa ne’ebé aprova ona iha loron 25 fulan jullu 2025.

Prezidente KRSJ, Dr. Avelinho Coelho hamutuk ho ekipa, hatudu otimizmu katak prosesu sei la’o ho diák no sei asume responsabilidade atu asegura transparénsia, integridade iha prosesu sira hotu.

Iha fatin hanesan, Dra. Carmelita Caetano Moniz, nu’udar membru Komisaun ne’ebé hetan indikasaun husi Parlamentu Nasionál, hato’o nia apresiasaun no agradesimentu ba inisiativa husi Sua-Eselénsia Ministru Justisa ba realizasaun enkontru referida. Rekrutamentu ne’e, membru Komisaun ne’ebé iha, fasilita de’it servisu administrativu sira, enkarrega de’it ba rekrutamentu no nomeasaun juri selesaun. Juri maka sei estabelese sira-nia regra rasik kona-bá prosedimentu ba rekrutamentu juis ba Tribunál Supremu Justisa, inklui matéria teste.

Bainhira konkursu no selesaun ba rekrutamentu juis ba Supremu Tribunál Justisa finaliza, sei halo fali rekrutamentu ba juis Tribunal Rekursu.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #