Viqueque, 26 Marsu 2026 – Ministériu Saúde liuhusi Servisu Saúde Munisípiu Viqueque hamutuk ho Diresaun Nasionál Edukasaun no Promosaun Saúde realiza atividade promosaun saúde kona-ba prevensaun moras dengue ho metodu door to door no distribuisaun Abate iha Suku Bahalarauain Viqueque villa.

Atividade ne’e halao ho objetivu atu aumenta koñesimentu no konsiensia komunidade kona-ba prevensaun moras dengue, ne’ebé transmisi husi susuk Aedes aegypti.

Durante atividade, ekipa saúde vizita uma-kain ida-idak hodi fó edukasaun direta ba familia sira kona-ba importánsia halo limpeza ambiente, elimina fatin moris susuk no aplika medida prevensaun hanesan (hamoos, taka no reutiliza fatin bee).

Aleinde ne’e, ekipa mos distribui Abate ba komunidade atu utiliza iha reservatoriu bee hodi kontrola larva susuk, nune’e bele prevene propagasaun dengue iha área refere.