Díli, 26 Marsu 2026 – Diresaun Kontrolu Vetor no Saúde Ambiental (DCVSA) iha Ministériu da Saúde, hamutuk ho Centers for Disease Control and Prevention (CDC), realiza treinamentu ida kona-ba utilizasaun Abate no Malathion, no mos oinsa uza makina fogin ho forma loos atu kontrola vetor moras, liu-liu dengue.

Atividade ne’e envolve partisipante sira husi DPHO Saúde Ambiental husi Munisípiu 11 iha Timor-Leste, ho objetivu atu haforsa kapasidade tékniku no aumenta efisiénsia iha prevensaun no kontrolu moras transmitidu husi susuk.

Treinamentu ne’e realiza iha salaun Kofi Annan Conference Room WHO, ho suportu tékniku husi parseiru dezenvolvimentu. Durante sesaun, partisipante sira aprende kona-ba dosajen loos, métodu aplikasaun ne’ebé seguru, no manutensaun ekipamentu hanesan makina fogin.