25 Marsu 2026 Vise-Ministru Fortalesimentu Institusionál Saúde (VMFIS) Sr. José dos Reis Magno Lic.SP, MM. halo abertura ba workshop Konsulta Teknika Interna Planu Fortalesimentu Institusionál Gabinete Étika Deontolojia no Garantia Qualidade. Workshop ne’e halo iha Salaun INSP-TL, Comoro.

Iha diskursu VMFIS hatete onra boot no responsabilidade aas mak hau diriji ba ita hotu iha sesaun abertura ba Konsulta Téknika ba Planu Fortalesimentu Institusionál Gabinete Étika, Deontolojia no Garantia Qualidade, fortalesimentu institusionál mak pilar ida ne’ebé importante tebes ba dezenvolvimentu nasional, Instituisaun sira ne’ebé forte deit organizadu no efikaz mak bele hala’o sira-nia funsaun ho diak, implementa polítika públika ho susesu no kontribui ho maneira konsistente ba progresu sustentável nasaun nian.

Vizaun ida ne’e alinhadu ho Ajenda 2030 Nasoens Unidas, liu-liu Objetivu Dezenvolvimentu Sustentável númeru 16, ne’ebé promove konstrusaun instituisaun sira ne’ebé efikaz, responsavel no inkluzivu iha setór saúde, nesesidade ida ne’e sai klaru liu tan, konfiansa populasaun nian depende diretamente ba qualidade servisu sira, maibé mos ba étika, responsabilidade no transparénsia ne’ebé iha prestasaun servisu sira, Iha kontestu ida ne’e mak GEDGQ iha papel estratéjiku sentrál.

Planu ne’ebé ohin ita halo konsulta ne’e, representa pasu importante ida atu konsolida sistema ida ne’ebé forte ba promosaun étika, deontolojia profisionál no garantia qualidade iha setór saúde Timor-Leste. planu ida ne’e la’ós de’it dokumentu tékniku maibé vizaun estruturadu ida ba transformasaun institusionál.

Planu ne’e bazeia iha pilar fundamental sira hanesan Reforsu polítika, lejislasaun no instrumentu normativu sira ne’ebé garante klaridade no konsisténsia iha prátika sira, fortalesimentu governasaun no jestaun institusionál, hodi promove efisiénsia, koordenasaun no transparénsia valorizasaun rekursu umanu, liu husi kapasitasaun kontinua no dezenvolvimentu profisionál Melloria infraestrutura no ekipamentu sira, hodi asegura kondisaun adekuadu ba funsionamentu, Modernizasaun teknolójika, ne’ebé permite jestaun ida ne’ebé efikaz, bazeia ba informasaun no evidénsia, Garantia sustentabilidade finanseira, ne’ebé esensial ba kontinuidade atividade sira, Reforsu parseria estratéjika sira, hodi promove aprendizajen no kooperasaun, ikus liu, monitorizasaun, avaliasaun no melloria kontinua, hodi asegura sistema evolui ho qualidade no konsisténsia.

Iha tempu hanesan, planu ida ne’e reforça misaun GEDGQ atu garante katak servisu no profisionál saúde hotu atua ho étika, responsabilidade no kapasidade téknika ne’ebé diak, hodi asegura padronizasaun prátika sira no melloria kontinua ba kuidadu saúde ba populasaun.

Vizaun ne’e klaru halo GEDGQ sai instituisaun referénsia nasional iha promosaun étika, deontolojia no qualidade, hodi asegura servisu saúde ne’ebé seguru, humanizadu no sentradu ba pasiente.

Importante atu sublinha katak GEDGQ la’ós de’it estrutura administrativu ida maibé pilar importante ida iha governasaun sistema saúde, atu hala’o regulasaun, supervizaun no melloria kontinua servisu sira, sira-nia servisu liga dimensaun tolu ne’ebé importante no interdependente, étika, ne’ebé orienta valor no desizaun deontolojia, ne’ebé regula komportamentu profisionál no qualidade, ne’ebé garante rezultadu ne’ebé seguru no efikaz.

Laiha integrasaun dimensaun tolu ne’e, la iha konfiansa, la iha kredibilidade no la iha qualidade iha kuidadu saúde tanba ne’e, konsulta téknika ida ne’e iha importánsia estratéjika boot. La’ós de’it atu valida dokumentu ida, maibé atu garante katak planu ida ne’e responde ho realistiku ba nesesidade institusionál no dezafiu sira iha setór ida ne’e.

Partisipa iha workshop ne’e maka parseiru sira, diretor munisipiu balun, kuadrus ezekutivu Ministeriu saúde balun, funsionariu no seluk-seluk tan.