Atividade refere hodi Selebra Loron Mundiál Tuberkuloze (TB) iha loron 24 Fulan Marsu Tinan 2026.

17 Marsu 2026: Ministériu Saúde (MdS) liuhosi Programa Nasionál Tuberkuloze (PNT) hamutuk ho Servisu Munisipál Saúde (SMS) Dili, Sentru Saúde Komunitária (SSK) Comoro, ho Programa Integradu Saúde (PIS), no mós Parseria sira hosi Maluk Timor, Menzies, Hamutuk Nasaun Saudavel (HAMNASA), Ordem de Malta, hala’o atividade Sensibilizasaun, Konsulta jerál no Espesilizada ba komunidade, Iha Suku Bebonuk, Postu Administrativu Dom Aleixo, Munisípiu Dili.

Atividade Sensibilizasaun ne’e hetan apoiu másimu hosi Autoridade lokál tanba bele mobiliza komunidade hodi partisipa iha konsulta refere, no mós hetan partisipasaun hosi komunidade.

Aleinde ne’e mós hala’o atividade Senbilizasaun ho Screening ba estudantes Universidade Nasionál Timor-Leste (UNTL) Fakuldade Agrikultur uza mákina Ray–X iha kareta Mobile Van, dezeminasaun informasaun uza Toa ba iha komunidade, no mós fahe brosura no taka sticker iha Transporte públiku no fatin públiku ne’ebé hetan apoiu husi edukasaun Promosaun Saúde (EPS), Estudante no Parseria sira hosi Klibur Domin, Caritas Dili, HAMNASA, Klínika Motael no Klínika Bairo-Pite.

Moras Tuberkuloze (TB) sai hanesan problema Saúde Públiku iha globál no mós Nasaun Timor-Leste (TL), moras TB maka moras hada’et ne’ebé kauza husi kutun ida ho naran Mycobacterium Tuberkuloze, kutun ne’e dala barak afeta ba ita nia pulmaun no mós orgaun seluk iha ita nia isin.

MdS liuhosi PNT hakarak apela ba komunidade katak bainhira iha sinais no sintomas kona-ba ba TB hanesan me’ar liu semana rua ka me’ar la hare ba nia durasaun tempu no akompaña ho isin manas, kosar, malirin iha tempu kalan, me’ar kahur ho ran, me’ar sente hirus-matan moras, isin tun, vontade han laiha no sente kolen.

Bainhira iha sinais no sintomas hirak ne’e bele ba lalais fasilidade Saúde ne’eb’e besik atu bele hetan atendementu Saúde ho lalais, deteksaun sedu di’ak tebes atu bele hala’o tratamentu sedu no mós hapara transmisaun kutun TB ba ema seluk.

KETA HALUHA MORAS TB FASIL HADA’ET MAIBÉ FASIL MÓS KURA.

AIMORUK BA MORAS TB BELE HETAN DE’IT IHA FASILIDADE SAÚDE HO GRATUITA.

#MídiaPalácioDasCinzas