𝗠𝗮𝗹𝗶𝗮𝗻𝗮, 𝟮𝟰 𝗠𝗮𝗿𝘀𝘂 𝟮𝟬𝟮𝟲

Ministru Obras Públikas (MOP), Samuel Marçal, hamutuk ho ekipa tékniku, iha tersa-feira ne'e halo monitorizasaun bá servisu normalizasaun mota Kailako ne'ebé hala'o husi ekipa IGE-ADI (Instituto de Gestão de Equipamentos - Apoio ao Desenvolvimento de Infraestruturas) iha Kailako, Munisípiu Bobonaro.

Objetivu husi atividade normalizasaun ne'e mak atu prevene inundasaun durante tempu udan no garante katak ekipa tékniku no ekipamentu pezadu husi IGE-ADI foka bá normalizasaun sedimentasaun ho hadia ka instala ponte provisóriu hodi fasilita movimentasaun transporte. Normalizasaun ne'e atu asegura mós moru protesaun (bronjong) no abutmen ponte inklui asegura komunidade sira nia natar ho komunidade sira ne'ebé hela besik mota ninin hodi hado'ok sira husi impaktu dezastre naturál.

Antes hakat bá Maliana, hodi monitoriza normalizasaun Mota Kailako, Ministru Obras Públikas, Samuel Marçal ho ekipa tékniku monitoriza uluk rai halai ne'ebé akontese iha área Karimbala, Munisípiu Liquiçá. Vizita ne'e ho objetivu atu halo observasaun direta bá estragus iha infraestrutura estrada no identifika pasu tékniku sira ne'ebé presiza foti hodi asegura movitasaun transporte ho seguru.

Husu bá ekipa tékniku sira atu servisu ho kualidade no aselera servisu normalizasaun ne'e antes udan-boot mai tan, hodi nune'e la fó perigu bá infraestrutura estrada no uma povu nian iha Kailako.

https://sdi.gov.tl/ministerio/presrealease/create 

*𝗠𝗶́𝗱𝗶𝗮-𝗠𝗢𝗣*