Likisa, 26 Marsu 2026 – Sekretaria de Estadu Kooperativas (SEKoop), liu husi Sekretáriu Estadu, Eng. Arsénio Pereira da Silva, M.Agr., hala’o serimónia tomada de posse ba estrutura Kooperativa Multi-Sektoral Hadomi, Halibur, Haburas, Ekonomia (KM–HHH’EK), iha Aldeia Nartutu, Suku Maumeta, Postu Administrativu Bazartete, Munisípiu Likisa.

Serimónia ne’e hetan akompañamentu husi ekipa SEKoop nian, inklui Chefe Gabinete Francisca L. de Araújo Simith, Sekretária Ezekutiva Sebastiana Mausaco, Inspetór Geral Policarpus Correia, no Diretór Nasionál Dezenvolvimentu Kooperativas Gil Bento.

Iha intervensaun, Sekretáriu Estadu hato’o parabéns ba Prezidente kooperativa, Kornel Alberto Pereira dos Santos, ho ninia estrutura tomak, ba kompromisu atu dezenvolve kooperativa iha munisípiu ne’e. Nia mos hato’o orgullu ba inisiativa ne’ebé lidera husi Prezidente, ne’ebé iha tempu hanesan kontinua servisu iha FALINTIL-Forças de Defesa de Timor-Leste (F-FDTL), maibé nafatin mobiliza komunidade atu partisipa iha atividade kooperativa.

“Kooperativa la presiza depende deit ba governu, tanba nia hanesan organizasaun sosial ida ne’ebé moris husi komunidade rasik,” dehan nia. Nia mos hateten katak kooperativa iha papel importante desde tempu uluk, inklui durante luta ba independénsia Timor-Leste, liu-liu iha área produsaun no seguransa alimentár.

Sekretáriu Estadu husu atu ekipa SEKoop iha munisípiu kontinua akompaña no servisu hamutuk ho membru kooperativa sira. Nia mos sublinha importánsia desentralizasaun poder lokal iha futuru, ne’ebé sei fó oportunidade ba munisípiu atu jere setor kooperativa ho efisiénsia liu.

Iha sorin seluk, Prezidente KM–HHH’EK, Koronel Alberto Pereira dos Santos, afirma katak tomada de posse ne’e sei ajuda implementa programa kooperativa tuir prinsipiu inkluzivu, ne’ebé la halo diskriminasaun ba ema ida-idak. Nia mos esplika knar no planu estratéjiku kooperativa nian ba tinan ida oin.

Serimônia tomada de posse ne’e hetan partisipasaun husi, Reprezentante Presidente Autoridade Munisipiu Likisa, Reprezentante Komandante Skuadra Munisipiu Likisa, Estrutura no membrus kooperativas KM – HHH’EK no mos ba funsionariu SEKoop nebe destaka ba iha Munisipiu Likisa.

#Média_SEKoop2026