𝟐𝟔 𝐌𝐚𝐫𝐬𝐮 𝟐𝟎𝟐𝟔

===========

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, hala’o enkontru ho Sekretáriu Adjuntu Grupu Ázia Súl no Sudeste, Sra. Michele Chan, iha Gabinete Vise-PM, Farol, Díli, Kinta 26 Marsu 2026.

Enkontru ne’e hetan partisipasaun husi Embaixadora Austrália iha Timor-Leste, Caitlin Wilson, no ofisiál superiór sira seluk inklui Konselleira Sra. Fabia, Sr. Chad no Sra. Rose Hunter.

Durante enkontru, parte rua diskute kona-bá prioridade estratéjika importante, inklui prosesu adezaun Timor-Leste ba ASEAN, preparasaun ba prezidénsia iha tinan 2029, no esforsu kontinua atu hametin integrasaun rejionál.

Iha área kooperasaun bilaterál, diskusaun mos foka ba implementasaun parseria estratéjika “Parseria Foun ba Era Foun” entre Timor-Leste no Austrália, ne’ebé asina husi Primeiru-Ministru Timor-Leste, Kay Rala Xanana Gusmão no Primeiru-Ministru Austrália, Anthony Albanese. Parseria ne’e buka atu promove páz no integrasaun rejionál, prosperidade no reziliénsia, no ligasaun entre povu rua.

Vise-PM subliña katak Timor-Leste fó prioridade ba diversifikasaun ekonómika, dezenvolvimentu sustentável, turizmu no ekonomia azul nu’udar ai-riin prinsipál ba dezenvolvimentu nasionál. Vise-PM mos destaka importánsia kooperasaun iha área infra-estrutura, investimentu setór privadu, no dezenvolvimentu rekursu umanu, inklui mobilidade traballadór timoroan.

Parte rua mos diskute oportunidade atu haburas kooperasaun iha área turizmu sustentável, konservasaun tasi nian, no reziliénsia klimátika, ne’ebé konsidera importante atu asegura dezenvolvimentu ekonómiku ne’ebé sustentável no inkluzivu.

Iha enkontru ikus, Vise-PM, agradese apoiu kontinuidade husi parseiru internasionál sira ba Timor-Leste nia adezaun ba ASEAN, no reafirma kompromisu Governu nian atu servisu besik ho Estadu-membru sira hodi kontribui ba prosperidade no estabilidade rejionál.

“Ami hein atu aprende husi ASEAN nia esperiénsia kona-bá integrasaun ekonómika rejionál no serbisu besik ho Estadu-membru ASEAN nian atu garante katak Timor-Leste nia integrasaun kontribui ho pozitivu ba prosperidade no estabilidade ita-nia rejiaun nian. Timor-Leste nafatin prontu atu servisu besik ho parseiru ASEAN sira hodi hametin konetividade, habelar oportunidade komérsiu no investimentu, no promove dezenvolvimentu sustentável ba benefísiu ita-nia povu sira,”afirma Vise-PM, MKAE no MTA.