Brisbane loron 26, fulan-Marsu, tinan 2026, Sekretáriu Estadu ba Formasaun Profisionál no Empregu, Sua Exelênsia Rogério Araújo Mendoça L.Ed, hamutuk ho delegasaun hasoru malu ho direjenti Business Chamber Queensland , hodi koalia konaba kooperasaun parseira ne’ebé mak durante ne’e lao hela no empregador sira sempre emprega Timor-oan sira.

Iha sorumutu Sekretáriu Estadu hato’o agradese ba Business Chamber Queensland ne’ebé mak durante ne’e fó ona oportunidade ba Timor-oan sira hodi servisu iha ne’e.

"Ha’u hakarak koñese no agradese kontribuisaun vitál hosi ami-nia parseiru sira iha empreza Queensland Berries no negósiu lokál barak seluk ne’ebé simu ona ami-nia traballadór sira. Imi-nia kompromisu hodi fó oportunidade sira-ne’e sai ona nu’udar fundasaun ba susesu ne’ebé ita haree ohin loron.” Dehan Sekretáriu Estadu.

“Timor-Leste la’ós de’it partisipante ida, maibé ami nu’udar parseiru ne’ebé fó aan tomak no ami nia traballador Timoroan na’in neen-nulu (60) ne’ebé atu serbisu iha JBS sira mak sei sasin moris ba dedikasaun no kbiit ne’ebé ami-nia trallador sira lori mai, atu apoia imi-nia negósiu sira, SEFOPE halo ona modernizasaun. Liuhosi ami-nia Portál Serbisu-na’in no Plataforma Aprendizajen foun, ami garante katak rekruitu hotu liu ona prosesu verifikasaun, hetan ona treinamentu, no prontu ona atu tuir padraun Austrália nian—liuliu iha setór sira ne’ebé iha demanda aas hanesan agrikultura, prosesamentu na’an, no ospitalidade.” Tenik sekretáriu Estadu.

“Atu hametin liután parseria ne’e, ha’u kontente atu konvida pesoalmente Kámara Komérsiu no empregador potensiál hotu-hotu atu mai hamutuk ho ami iha ami-nia Expo ne’ebé sei mai iha fulan-Juñu, foku ba setór sira ne’ebé relevante ba kma’an PALM. Ida-ne’e sei sai oportunidade primeiru de klase atu haree rasik ami-nia sistema funsiona, ko’alia fali ho ami-nia ema, no haree rasik saida mak Timor-Leste bele oferese.”