DILI,28/03/2026: Vise-Primeiru Ministru, Ministru Kordenador ba Assuntus Sosiais, Ministru ba Dezenvolvimentu Rural no Habitasaun Komunitaria, Eng. Mariano ASSANAMI Sabino, akompaña Prezidente Republika, José Ramos Horta, sai sasin ba lansamentu voo dahuluk Aero Dili nian ba Kualalumpur, Malazia, iha Aeroportu Internasional Prezidente Nicolau Lobato, Dili, Timor-Leste.

Aero Dili nia operasaun ida ne’e la'ós de'it kona-ba konektividade hodi liga Timor ho nasaun seluk, maibe ida-ne'e mak sentru ba dezenvolvimentu ekonómiku ne'ebé inkluzivu no sustentável. Timor nu’udar nasaun ki’ik ne’ebe iha ASEAN papél konetividade aérea nian sai importante liután. Konetividade ida ne’e hanesan meius ida atu realiza ita-nia vizaun ba Timor ida ne’ebé ligadu liu, forte liu, no kompetitivu liu iha palku globál.

Husi operasaun ida-ne'e halo klaru katak konetividade aérea la'ós de'it kona-ba hamenus distánsia fíziku sira, maibe ne’e sai hanesan instrumentu xave ida iha polítika dezenvolvimentu indústria aviasaun nian, ita la'ós de'it hametinTimor-Leste nia pozisaun iha mundu nia matan maibé mós fó kontribuisaun ida ne'ebé loos hodi hadi'a bem-estar Timor-oan nian.

To'o ona tempu ba Timor atu kompete liután, alkansa nia mehi atu sai nasaun ida ne'ebé dezenvolvidu no independente.