DILI,27/03/2026: Vise-Primeiru Ministru, Ministru Kordenador ba Assuntus Sosiais, Eng. Mariano ASSANAMI Sabino, partisipa serimonia aniversariu ba Polisia Nasional Timor-Leste (PNTL), ba dala 26 no tomada de pose ba Komandante Jeral PNTL Komisáriu Asistente Afonso dos Santos no Segundu Komandante Jerál PNTL Komisária Asistente Natércia Eufrásia Soares Martins, iha palasiu Governu.

Komjer PNTL foun naran Komisáriu Asistente Afonso dos Santos no Segundu Komandante Jerál PNTL Komisária Asistente Natércia Eufrásia Soares Martins. Sira nain-rua hetan nomeasaun husi Konsellu Ministru iha loron 25 Marsu 2026, ho mandatu tinan-tolu, hahu husi 27 Marsu 2026 to'o 27 Marsu 2029.

Komisáriu Asistente Afonso dos Santos iha esperiénsia kle'an iha komandu PNTL, inklui lideransa Unidade Espesiál Polísia (UEP) no Komandu Operasaun Nasionál. Enkuantu, Komisária Asistente Natércia Eufrásia Soares Martins hanesan feto dahuluk iha postu Segundu Komandante Jerál PNTL, no iha esperiénsia iha knaar importante sira, inklui Diretora Ezekutiva Servisu Migrasaun.