Baucau, 25 Marsu 2026; Vise-Ministru ba Operasionalizasaun Ospitál (VMOH-sigla portugés) dr. Flávio Brandão Mendes de Araújo hala'o vizita traballu ba Ospitál Rejionál Edurado Ximenes-Baucau (HOREX-Baucau) hodi ensera atividade formasaun kona-ba kuidadu krítiku, ne'ebé hala'o durante loron tolu iha HOREX, Munisípiu Baucau.

Atividade formasaun ne’e halo ba dala-haat ona ne’ebé foku ba ekipa pesoál saúde sira-ne’ebé servisu iha kuidadu intensivu oinsá sira bele iha koñesimentu ne’ebé natoon, uza maneira estruturadu hodi halo ezaminasaun identifikasaun ba pasiente sira-nia problema atu bele identifika sedu no halo prevensaun sedu hafoin halo tatamentun ne’ebé nesesáriu no salva pasiente nia vida.

Formasaun ne’e ho objetivu prinsipál mak, hasa’e formandu sira-nia kapasidade no koñesimentu atu halo atendimentu, atu utiliza másimu investimentu ne’ebé mak governu investe ona ba iha fasilidade saúde liuliu ICU iha ospitál referál sira, atu redús númeru transferénsia sira-ne’ebé la nesesáriu ba Hospital Nacional Guido Valadares, ho nune’e sira rasik bele jere no bele hametin konfiansa husi komunidade ba sira.

Iha biban ne’e, VMOH fahe mós sertifikadu ba formandu sira hamutuk na’in-20 ne'ebé mai hosi Hospital Referál Maubisse, Maliana, Suai, Oe-cusse, Díli inklui Horex-Baucau.

Aleinde ne’e VMOH halo mós enkontru extraordináriu ho konsellu administrativa HOREX ba harmonizasaun no funsionamentu servisu administrasaun no klínika iha HOREX-Baucau.