Iha loron 23-26 fulan Marsu, 2026, Delegasaun ida hosi Ministériu Edukasaun partisipa iha formasaun ezekutivu iha Singapura ho títulu “Halo Dezeñu ne’ebé Sei Atinji Dezempeñu Aas: Saida mak halo Sistema Edukasaun ida ProdúZ Rezultadu Di’ak”. Formasaun ida-ne’e nu’udar parte ida hosi parseria ba tempu naruk entre Ministériu Edukasaun Timor-Leste no Institutu Nasionál Edukasaun, Singapura.

Lidera hosi Sr. Domingos Martins, Prezidente INFORDEPE, delegasaun ne’e bá ho objetivu atu aprende estratéjia espesífiku balu hodi hasa’e kualidade manorin sira-nian, liuliu haree ba oinsá bele fornese dezenvolvimentu profisionál ne’ebé realmente bele tulun manorin sira atu hala’o sira-nia knaar ho di’ak liután no ajuda alunu sira atu hetan rezultadu aprendizajen ne’ebé aas.

Bazeia ba ideia katak nasaun nia dezenvolvimentu ekonómiku depende ba ninia sistema edukasaun nia kualidade, no katak manorin mak fuan sistema edukasaun ne’e nian, ekipa esplora estratéjia balu, inklui:

1. Oinsá halo profisaun manorin nian sai atrativu hodi bele atrai kandidatu sira ne’ebé di’ak liu;

2. Oinsá bele halo prosesu rekrutamentu ida ne’ebé asegura manorin sira hahú serbisu ho potensiál másimu;

3. Oinsá Ministériu tomak, inklui INFORDEPE, sei serbisu hamutuk hodi asegura manorin sira kontinua hasa’e sira-nia dezempeñu durante sira-nia karreira;

4. Oinsá asegura dirijente eskolár iha kapasidade aas atu jere ninia eskola no apoia ninia manorin sira;

5. Importánsia hosi halo planu di’ak no asaun konkretu ne’ebé sei suporta exelénsia iha área ensinu-aprendizajen;

6. Diresaun ida-idak nia knaar hodi asegura sistema ida-ne’ebé funsiona ho di’ak no halo planu ona ba futuru.

7. Pasu saida mak bele halo hodi hasa’e fali imajen manorin nian nu’udar profisionál dignu no ne’ebé merese respeitu másimu,

8. Papél importante hosi sistema valór komún sira-ne’ebé mak fundamentál ba manorin ida-idak nia serbisu, inklui Kuadru Kompeténsia Manorin sira-nian, ne’ebé sai baze ida de’it ba rekrutamentu, formasaun, no progresaun iha rejime karreira.

Durante enserramentu, Prezidente INFORDEPE destaka katak iha área edukasaun Timor-Leste buka halo parseria ho Singapura, nu’udar membru ASEAN ne’ebé iha sistema edukasaun di’ak liu, no mós nasaun ida-ne’ebé foin hahú ukun-an tinan 60 liubá maibé konsege hasa’e sira-nia sistema edukasaun lalais, to’o sai númeru 1 iha mundu. Hodi rekoñese katak IX Governu Konstitusionál fó importánsia aas ba kualidade manorin no eskola sira, no bazeia ba instrusaun implísitu hosi S.E. Ministra Edukasaun, Dulce de Jesus Soares, delegasaun sei ba fali Timor ho rekomendasaun konkretu sira ne’ebé sei uza hodi hadi’ak sistema rekursu umanu, formasaun no kualidade iha eskola idaidak.

#MédiaME