Covalima, 24 Marsu 2026 — Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál (ESG-ESTV), Sr. Domingos Lopes Lemos, hamutuk ho Diretór Nasionál Ensinu Sekundáriu Jerál Sr. Benjamin da Cruz no Diretór Nasionál Infraestrutura, Sr. Hélio Lopes, partisipa no sai hanesan mediadór iha enkontru ida kona-ba disputa rai ba konstrusaun edifísiu foun Eskola Filiál Salele kuarta-feira ne’e.

Objetivu prinsipál husi enkontru ida-ne’e mak atu rona parte hotu-hotu no buka solusaun ba dezentendimentu kona-ba rai ne’ebé sei uza ba konstrusaun edifísiu foun eskola filiál Salele.

Liuhusi diskusaun ne’ebé realiza ho atmosfera kolaborativu, parte sira konsege hetan komprensaun mútua no solusaun ida-ne’ebé bele permite kontinua obra konstrusaun edifísiu eskola refere.

Prezensa Sekretáriu Estadu ESG-ESTV konsidera importante tebes tanba bele fasilita diálogu no fó orientasaun direta hodi rezolve konflitu ne’ebé durante ne’e impede progresu projetu.

Ho rezolusaun ne’e, espera katak konstrusaun edifísiu foun ba Eskola Filiál Salele bele kontinua ho di’ak no fó benefísiu ba estudante no komunidade iha área refere.

Enkontru ne’e realiza iha Salaun Interinu Munisípiu Covalima, no hetan partisipasaun másimu husi PAM Covalima Sr. Miguel Armando Cardoso, Diretora Edukasaun Munisipál, reprezentante instituisaun Kadastru Terras no Propriedades Covalima, Xefe Suku, komunidade, no parte relevante sira-seluk.