Liquiça, 27 Marsu 2026 – Ministériu Edukasaun liuhosi Diretór Nasionál Ensinu Rekorente (DNER), Sr. Alfredo de Araújo, hamutuk ho Estrutura Sentru Komunitária Aprendizajen (SKA) no Ekipa Téknika hosi Nasionál, hala’o vizita traballu integradu ida ba Munisípiu Liquiça.

Vizitasaun refere sai hanesan oportunidade estratéjika atu hametin koordenasaun institusionál, fahe informasaun kona-ba programa Ensinu Rekorrente, no husu apoiu hosi autoridade lokál sira hodi garante susesu ba implementasaun programa iha munisípiu ne'e.

Diretór Alfredo, entrega mos dokumentu Perfil Sentru Komunitária Aprendizajen (SKA) Maumeta nian ba Reprezentante Prezidente Autoridade Munisípiu Liquiça no objetivu husi entrega dokumentu ne’e atu fó koñesimentu klean liután ba autoridade lokál sira kona-ba situasaun loloos, kapasidade, no nesesidade sira ne’ebé sentru ne’e enfrenta, hodi fasilita koordenasaun ba dezenvolvimentu iha futuru.

Hafoin vizitasaun refere, delegasaun nasionál ne’e kontinua kedas ho vizita fiskalizasaun ba fatin formasaun nian. Iha fatin ne’ebá, ekipa haree rasik progresu hosi atividade prátika ne’ebé formadora sira hala’o ba estudante sira, liuliu iha arte soru tais.

"Vizita ida-ne'e importante tebes atu ita bele hatene progresu loloos iha terrenu. Ita la'ós de'it koordena iha nível leten ho autoridade sira, maibé ita mos tenke fó apoiu no monitoriza kualidade formasaun ne'ebé estudante sira simu, hanesan arte soru tais ne'ebé sai mos parte hosi ita-nia identidade kulturál," dehan Alfredo.

Atividade ne’e remata ho diskusaun badak entre ekipa nasionál, estrutura SKA no formadór/a, sira hodi rona kestaun téknika no dezafiu sira ne’ebé sira hasoru durante prosesu aprendizajen, nune’e bele buka solusaun ne’ebé di’ak ba futuru.

#EmiliodaCruzLopes

#MédiaME