Liquiçá, 26 Marsu 2026 - Ministériu Edukasaun liuhosi Diretór Nasionál Ensinu Rekorrente (DNER), Sr. Alfredo de Araújo, lidera programa Estudu Interkámbiu ne’ebé halibur estrutura no formadór sira husi Sentru Komunitáriu Aprendizajen (SKA) Cristo-Rei Kriativu no Mora Vida Mascal husi Munisípiu Dili, hamutuk ho SKA Maumeta husi Munisípiu Liquiçá. Atividade ne'e hala'o ho susesu iha Sentru Maumeta, Liquiçá.

Iha biban ne’e, Diretór Alfredo, hateten katak objetivu prinsipál husi atividade ne’e mak atu fahe esperiénsia, progresu, no mós diskute dezafiu sira ne’ebé implementa ona durante períodu tinan 2025 to’o 2026.

"Atividade ne’e la’ós de’it kona-ba vizita malu, maibé oinsá ita bele haburas kriatividade no inovasaun entre SKA sira. Ha'u fó korajen ba responsável sentru sira atu labele rende ba dezafiu sira, maibé kontinua servisu ho fuan hodi fó naroman ba ita-nia komunidade," dehan Diretór DNER.

Nia mós husu ba formandu sira atu aproveita oportunidade ne’ebé iha, hodi sai kbiit-na’in ne’ebé prontu kontribui ba dezenvolvimentu nasionál.

Enkuantu, Prezidente SKA Maumeta (Liquiçá) Sr. Lino Alves Correia de Araújo, nu’udar uma-na’in, subliña katak sira foka liu ba programa Abilidade ba Vida (Life Skills) ne’ebé sai nu’udar prioritáriu husi DNER. Sira aprezenta rezultadu husi kursu Lian Inglés, Koreia, no Informátika (Komputadór) ne’ebé fó kbiit ba foin-sa’e sira hodi prepara aan ba mundu traballu no komunikasaun internasionál.

Alende ne’e, sira mós informa katak prepara hela hodi implementa Programa Nasionál Ekivalénsia husi DNER ne’ebé foin atu hahú iha tinan ne’e, no oras ne’e sira sei iha hela prosesu rejistrasaun ba estudante foun sira.

Iha tinan 2025, SKA Maumeta susesu fó kapasitasaun ba kursista hamutuk na’in 88 ba kursu Lian Inglés (mane 23, feto 65), na’in 68 ba kursu Lian Koreia (mane 52, feto 16), na’in 44 ba kursu Komputadór (mane 12, feto 32), no na’in 9 ba kursu vokasionál soru tais (mane 1, feto .

Enkuantu ba tinan 2026, programa ekivalénsia nian rejista ona benefisiáriu hamutuk na’in 26 ba Ensinu Báziku Siklu 1 no 2, na’in 53 ba Siklu 3, no na’in 106 ba Ensinu Sekundáriu, ne’ebé kobre totál entre feto no mane.

#MédiaME