𝟏 𝐌𝐚𝐫𝐬𝐮 𝟐𝟎𝟐𝟔

===========

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, hamutuk ho Chefe Casa Civíl (CCC) Prezidénsia Repúblika (PR), Henriqueta da Silva, hala’o enkontru ho ekipa governamentál no instituisaun relevante sira hodi prepara ba realizasaun eventu nasionál tolu ne’ebé sei hala’o iha loron 8 fulan Agostu 2026 ne’e.

Eventu sira ne’e mak hanesan, Dili International Marathon, programa Siénsia ba Dezenvolvimentu, no selebrasaun Natal ho Povu, ne’ebé konsidera hanesan prioridade estratéjika hodi promove desportu, turizmu sustentável, inovasaun sientífika no identidade nasionál.

Iha enkontru ne’e, Vise-PM kualidade hanesan Prezidente Komisaun Organizadora ba eventu ne’e haktuir katak, Governu hakarak tinan 2026 sai hanesan ezemplu di’ak ba organizasaun nasionál, liuhusi unidade institusionál no projesaun pozitivu ba Timor-Leste iha nível internasionál. Vise-PM subliña katak, paz, estabilidade no unidade nasionál mak sai baze fundamentál ba dezenvolvimentu sustentável.

“Eventu sira ne’e importante tebes tanba bele atrai investimentu estranjeiru, dinamiza ekonomia lokál no kontribui ba redus dezempregu. Estabilidade nasionál mak kondisaun prinsipál atu garante susesu inisiativa hirak ne’e,”dehan Vise-PM liuhusi nia intervensaun iha reuniaun koordenasaun ho ekipa ne’ebé hala’o iha Palásiu Prezidensiál, Bairu-Pité, Díli, Tersa, 31 Marsu 2026.

Vise-PM mós destaka papél importante husi lideransa Prezidente Repúblika, José Ramos-Horta nian iha konsolidasaun unidade nasionál no mitigasaun tensaun polítika, liu-liu tanba tinan 2026 marka faze final mandatu prezidensiál, ne’ebé iha valór simbóliku bo’ot ba nasaun.

Objetivu husi reuniaun ida ne’e mak atu konfirma estrutura organizasaun, fortifika koordenasaun institusionál no estabelese liña relatóriu klaru entre entidade sira ne’ebé envolve iha implementasaun atividade hirak ne’e.

Iha oportunidade ne’e, Vise-PM mós konvida instituisaun no ministériu hotu-hotu atu servisu hamutuk hanesan ekipa ida de’it, hodi asegura katak preparasaun no ezekusaun eventu sira ne’e la’o ho susesu hodi atinji rezultadu ne’ebé di’ak.