Dili, 01-04-2026—Ekipa SEI, ne’ebé mak lidera husi Diretór Nasionál Polítika Igualdade Jéneru (DNPIG-SEI), Sr. Abílio Barreto, akompaña husi Xefe-Departamentu Prevensaun no Kombate Violénsia Bazeia ba Jéneru, Sra. Carla Maria Valente, hamutuk ho TAF-NABILAN hala'o enkontru ho parseiru sira hanesan PHD no Sosiedade Sivíl pontu fokál ba pilár sira iha PAN-VBJ hanesan Fokupers, Fundasaun Alola no ALFeLa, hodi diskute kona-ba harmonizasaun dadus ba Hakerek Relatóriu Anuál Estadu nian ba implementasaun Planu Asaun Nasionál kontra Violénsia Bazeia ba Jéneru (PAN-VBJ), ne’ebé mak organiza husi SEI ho apoiu husi TAF-NABILAN iha Sala enkontru TAF-NABILAN, Bebonuk.

Enkontru refere ho objetivu atu haree fila fali dadus hirak ne’ebé mak ekipa sira hotu rekolla ona no hirak-ne'ebé mak persiza kompleta hodi bele inkorpora iha relatóriu anuál Estadu nian ba implementasaun PAN-VBJ ne'ebé mak sei aprezenta ba iha Parlamentu Nasionál.

Deputy Team Leader TAF-NABILAN, Sra. Maria Veronika M. Costa, iha nia intervensaun hatete, enkontru ida-ne’e sei hakle'an liután kona-ba dadus ba hakerek Relatóriu PAN-VBJ no hanesan parte kontinusaun husi servisu hamutuk entre ekipa SEI ho TAF-NABILAN hodi kompleta dadus sira bazeia ba enkontru dahuluk iha semana ida antes hodi hahú inkorpora iha narativa relatóriu nian.

"Relatóriu PAN-VBJ tinan 2024 no 2025 ida-ne’e sei aprezenta ba Parlamentu Nasionál iha tempu badak, nune’e ita-nia tempu agora limitadu oituan, maibé di’ak tanba ita hahú ona elabora ita-nia dadus antes kedas no ita sei uza iha ita-nia enkontru ohin loron no iha servisu balun mós atu bele halo kompletu liután ita-nian dadus balun ne’ebé mak seidauk kompletu atu nune’e ita bele hakat ona ba iha hakerek relatóriu inklui atu analiza no haforsa ho dadus sira no hein katak diskusaun ne'e bele la’o ho di’ak, produtivu, bele haforsa ita-nia relatóriu".

Diretór Nasionál Polítika Igualdade Jéneru (DNPIG-SEI), Sr. Abilio Barreto, iha abertura hatete katak Sekretaria Estadu ba Igualdade tinan ne’e sei aprezenta relatóriu implementasaun Planu Asaun Nasionál kontra Violénsia Bazeia ba Jéneru tinan 2024-2025 ba Parlamentu Nasionál tanba ne’e mak ohin ita realiza sorumutu ne'e hodi konfirma dadus hotu ne’ebé iha ona atu nu’une bele halais prosesu elaborasaun relatóriu PAN-VBJ. Diretór hato'o Agradese ba entidades implementadór sira hotu ne'ebé iha kolaborasaun di'ak hodi kontribui ba fornese dadus, no agradese mós ba Parseiru TAF- Nabilan, PHD, Fundasaun Alola, Fokupes no ALFeLa ne’ebé hatudu kompromisu iha servisu sira, nune'e fiar katak ho sorumutu ne’e bele lori rezultadu ne’ebé durante ne’e ita hotu hein hela ba Produsaun relatóriu.

Enkontru ne’e, iha mós aprezentasaun husi Konsultór ba hakerek Relatóriu PAN-VBJ tinan 2024 no 2025, Sr. Marino Mouzinho, kona-ba Progresu Elaborasaun Relatóriu no aprezenta dadus sira ne'ebé iha ona. Entidades sira ne'ebé partisipa fahe ba grupu tolu tuir responsabilidade iha kada pilár hodi haree fila fali no kompleta dadus tuir indikadór ne’ebé iha ona no identifika lakunas, dezafiu no rekomendasaun sira hodi kompleta iha relatóriu ida-ne’e. Enkontru ne'e partisipa ho másimu husi funsionáriu/a husi DNPIG-SEI hamutuk ho reprezentante parseiru TAF-NABILAN, PHD, Fokupers, Fundasaun Alola no ALFeLa.

#Média-SEI#