𝙇𝙞𝙠𝙞𝙨á-𝙇𝙤𝙚𝙨 31 𝙈𝙖𝙧𝙨𝙪 2026-Ministru Komérsiu no Indústria, Sr. Nino Pereira partisipa iha serimónia kolleta da-huluk no inagurasaun luhan Broiler modelo ne’ebé lokaliza iha suku Vatuboro Postu Administrativu Loes Munisípiu Likisá.

Ministru Nino Pereira destaka, politika Governu nian ne’ebe kontinua aposta ba dezenvolvimentu iha área produtiva sira hanesan projetu ne’e. Tanba ne’e, presiza tebes atu iha asaun konkretu no efetivu, hamutuk ho koordenasaun integradu entre entidade relevante sira, hodi fasilita no hasa’e di’ak liután atividade negosiu ida ne’e, nune’e bele kontribui ba kriasaun oportunidade servisu, hasa’e rendimentu komunidade nian no impulsiona kresimentu ekonomia nasional.

“Ho rezultadu ne’ebé mak hatudu ona husi kompania Funan Santalum UNIP, Lda., ida ne’e mos demonstra katak inisiativa no investimentu iha setór produtivu bele lori benefísiu konkretu, la’ós de’it ba kompania rasik, maibé mos ba komunidade no ekonomia nasional. Ida ne’e reforsa mós hanoin katak, ho planeamentu di’ak, jestaun efisiente no apoiu husi Governu, atividad.e negosiu sira bele dezenvolve ho sustentavel no kontribui ba dezenvolvimentu ekonomiku país nian”. hateten Ministru Komérsiu no Indústria

Ministru mós aprezenta, Timor-Leste iha ona Lei Promosaun ba Exportasaun ne’ebé aprova ona iha Parlamentu Nasionál. Lei ida ne’e iha objetivu atu kria ambiente negosiu ne’ebé klaru, seguru no kompetitivu, hodi regula atividade produz exportasaun no re-exportasaun, tantu husi emprezáriu nasional No internasionál.

Iha kolleita no inaugurasaun modelu closed house ne’e hala’o husi Vise-PM II, Ministru Koordenadór ba Asuntu Sosial no Ministru Dezenvolvimentu Rurál no Abitasaun Komunitária, Mariano Assanami Sabino, ne’ebé mos destaka Governu nia prioridade atu fó apoiu ba setór privadu sira, hodi dezenvolve no hasa’e sira-nia kapasidade produtiva, hametin investimentu no kria oportunidade servisu ba komunidade, nune’e bele kontribui diretamente ba seguransa ai-han no kresimentu ekonomia nasional.

𝙈𝙚𝙙𝙞𝙖 𝙈𝘾𝙄