04-April-2026

Railaco, Ermera – Tersa-feira, 31/03/2026

Hafoin tinan 8, Mary Mackillop Today (MMT) entrega eskola pré-eskolár sia (9) iha postu railaco husi suko 5 ba Ministériu Edukasaun.

Eskola 9 ne’e hari’i husi Fundasaun Edmund Rice Australia iha tinan 2005, no entrega ba MMT iha tinan 2018, no finalmente iha tinan 2026 MMT entrega ba Ministériu Edukasaun hodi maneja no transforma sai di’ak liu tan.

Eskola sia ne’e kompostu husi manorin voluntáriu nain 22 no atual estudante 350.

Dezde 2005 to’o agora prodúz ona estudante hamutuk rihun rua resin.

Iha diskurso, Diretór Jeral Edukasaun Pré-Eskolár, Ensinu Báziku no Ensinu Rekorrente (DG EPEBER) Apolinário Serpa Rosa hateten, ba hau nia alin manorin voluntáriu na’in 22, ita-bo’ot sira mak sai nu’udar Jesus nia saseluk, di’ak ne’ebé ohin ita kuda sai nu’udar fini ida ne’ebé sei kolleta iha futuro. Agradese ba Fundasaun Edmund Rice ne’ebé husik hela memoria iha Railaco munisípiu Ermera, nomos MMT ne’ebé hatutan to’o ohin loron hodi entrega ba Governu tanba hakarak iha sustentabilidade ba obra hirák ne’e.

Aleinde ne’e, Diretor Ezekutivu MMT Alipio Baltazar hateten, Ohin ita entrega eskola 9 ba Governu atu kontinua servisu ne’ebe durante ne’e Mary Mackillop hala’o, eskola sira ne’e prense ona rekezitu no nia lisensiamentu iha ona prosesu hodi sai eskola públika.

Iha serimónia ne’e, parte MMT entrega mos sertifikadu Apresiasaun nian ba manorin dedikadu sira no asina termu entrega husi MMT ba Ministériu Edukasaun.

#MédiaMEJornalistaMateus