𝟎𝟖 𝐀𝐛𝐫𝐢𝐥 𝟐𝟎𝟐𝟔

==========

Sorumutu Konsellu Ministru sira iha loron 8 fulan-abril tinan 2026 iha Palásiu Governu, Díli, aprova projetu arkitetóniku ba Sentru Konvensaun Díli foun, hafoin análize ba proposta modelu arkitetóniku ne’ebé aprezenta hosi Vise-Primeiru-Ministru, Ministru Koordenadór ba Asuntu Ekonómiku, Dato’ Seri Francisco Kalbuadi Lay.

Projetu estruturante ida-ne’e ho objetivu atu sai uma-na’in ba reuniaun sira ASEAN nian durante Timor-Leste nia prezidénsia iha tinan 2029, inklui simeira Xefe Estadu no Xefe Governu sira nian, no mós eventu ho dimensaun bo’ot sira seluk.

Sentru konvensaun foun sei harii iha área portu tuan, iha Baía Díli nia sorin, no sei inklui edifísiu prinsipál ida ho sala konferénsia, auditóriu no pavillaun sira ba espozisaun, no mós área komplementár sira lazer no turizmu nian, inklui paseiu ida hodi la’o iha kais nia sorin, akuáriu ida no sentru entretenimentu no komérsiu ida.

𝐍𝐨𝐦𝐞𝐢𝐚 𝐃𝐮í𝐥𝐢𝐨 𝐧𝐮’𝐮𝐝𝐚𝐫 𝐃𝐢𝐫𝐞𝐭ó𝐫 𝐄𝐳𝐞𝐤𝐮𝐭𝐢𝐯𝐮 𝐓𝐫𝐚𝐝𝐞𝐈𝐧𝐯𝐞𝐬𝐭 𝐓𝐢𝐦𝐨𝐫-𝐋𝐞𝐬𝐭𝐞

Nune’e mós ho proposta husi Vise-Primeiru-Ministru, Ministru Koordenadór ba Asuntu Ekonómiku, Dato’ Seri Francisco Kalbuadi Lay, Konsellu Ministru sira aprova projetu Rezolusaun Governu ba nomeasaun Duílio Marino Gusmão Araújo da Silva nu’udar Diretór Ezekutivu ba Ajénsia Promosaun Investimentu no Esportasaun Timor-Leste, IP, ne’ebé koñesidu ho naran TradeInvest Timor-Leste.

Nomeasaun ne’e bazeia ba kompeténsia téknika no aptidaun ne’ebé hatudu ona ba kargu ne’e, ba mandatu tinan tolu, iha rejime eskluzividade. Duílio Marino Gusmão Araújo da Silva hala’o knaar nu’udar Diretór Adjuntu iha TradeInvest Timor-Leste dezde tinan 2019, antes ne’e okupa ona kargu sira nu’udar Diretór Promosaun Esportasaun, Jerente Promosaun Esportasaun, no mós Jerente Relasaun Esterna no Marketing.