Dili, 8 Abril 2026 – Ministru Komérsiu no Indústria, Sr. Nino Pereira, partisipa iha sorumutu koordenasaun ho Ministru Agrikultura, Pekuária, Peska no Florestas (MAPPF), Sr. Marcos “Mameta” da Cruz, no Prezidente Sentru Logístika Nasionál (CLN). Diskusaun ne’e foka ba situasaun atuál no preparasaun logístika relasiona ho sasan báziku, inklui folin iha merkadu, hodi responde ba impaktu husi funu iha médiu oriente ne’ebé seidauk remata to’o ohin loron.

Iha sorumutu ne’e, Governu liuhusi MCI, MAPPF no CLN halo avaliasaun hamutuk no prepara medida antisipasaun atu garante estabilidade fornecimento no folin sasan báziku iha merkadu nasional. Diskusaun ne’e fó prioridade ba:

• 𝗠𝗼𝗻𝗶𝘁𝗼𝗿𝗶𝘇𝗮𝘀𝗮𝘂𝗻 𝗻𝗼 𝗸𝗼𝗻𝘁𝗿𝗼𝗹𝘂 𝗳𝗼𝗹𝗶𝗻 𝘀𝗮𝘀𝗮𝗻 𝗯á𝘇𝗶𝗸𝘂

• 𝗣𝗿𝗲𝗽𝗮𝗿𝗮𝘀𝗮𝘂𝗻 𝗹𝗼𝗴𝗶𝘀𝘁𝗶𝗸𝗮 𝗮𝘁𝘂 𝗴𝗮𝗿𝗮𝗻𝘁𝗲 𝗱𝗶𝘀𝗽𝗼𝗻𝗶𝗯𝗶𝗹𝗶𝗱𝗮𝗱𝗲 𝗵𝗮𝗵𝗮𝗻

• 𝗝𝗲𝘀𝘁𝗮𝘂𝗻 𝘀𝘁𝗼𝗸 𝗳𝗼𝘀 𝗻𝗼 𝗽𝗼𝗹í𝘁𝗶𝗸𝗮 𝗲𝘅𝗽𝗼𝗿𝘁𝗮𝘀𝗮𝘂𝗻

• 𝗔𝘂𝗺𝗲𝗻𝘁𝘂 𝗽𝗿𝗼𝗱𝘂𝘀𝗮𝘂𝗻 𝗹𝗼𝗸𝗮𝗹 hanesan hare, batar no produtu agríkola seluk.

Medida sira ne’e konsidera importante atu prevene inflasaun bainhira krize global kontinua naruk no bele afeita cadeia fornecimento internasionál.

Tanba impaktu funu iha Médiu Oriente ne’ebé alarga ba nasaun barak, liuliu krize enerjia global, Governu Timor-Leste liuhusi Ministériu Petróleu no Rekursu Minerál (MPRM) implementa ona medida antisipasaun, inklui Dekretu-Lei sira atu regula no estabiliza presu konbustível hanesan gasolina no gasóleo .

Governu kontinua monitoriza tendénsia merkadu internasionál, inklui movimentu presu aihan mundial, atu garante estabilidade ekonomia doméstika.

Ministru Komérsiu no Indústria, Sr. Nino Pereira, akresenta katak tuir monitorizasaun ne’ebé halo husi ministériu, folin sasan nesesidade báziku, liuliu fós, sei iha prosesu normal no kontroladu.

Alende ne’e, MCI liuhusi Direção Nasionál Regulasaun Konsumidór organiza sorumutu ho kompanhia importadór sira hanesan Lisun Prizos, ALFA, Kreatif Furak no Timor Food. Importadór sira hato’o katak stok fós iha kapasidade atu responde ba nesesidade entre fulan rua to’o fulan tolu.

Presu fós iha merkadu agora dadaun varia entre sakus 20kg to’o 30kg ho folin entre US$8.50 to’o US$16.00.

Atualmente, stok fós nasional hamutuk to’o 19,588 tonelada, no tanba apoiu husi Sentru Logístika Nasionál (CLN) ho tan 1500 tonelada hare kulit, total reserva hamutuk 21,088 tonelada. Kapasidade ne’e bele garante fornecimento ba períodu aproksimadamente fulan tolu.

Enkontru ne’e mós hatudu katak kompanhia importadór balun iha hela fós iha dalan no sei to’o iha Portu Dili iha tempu badak, ne’ebé bele aumenta seguransa stok no estabilidade merkadu rai laran.

Partisipa iha sorumutu ne’e kargu Xefia sira hanesan Diretór Jerais, Diretores Nasionál, Asesor no tekniku husi MCI, MAPPF no CLN.

𝙈é𝙙𝙞𝙖 𝙈𝘾𝙄