Asuntu : Sekretariu Estadu Abertura Feira Kareira no Edukasaun iha Munisipiu Bobonaro Bobonaro loron 9, fulan-Setembru, tinan 2025, Sekretariu Estadu ba Formasaun Profissionál no Empregu, Sua Exelénsia Rogério Araújo Mendonça L.Ed, abertura feira kareira no Edukasaun iha Munisipiu Bobonaro. Iha diskursu Sekretariu Estadu hateten, feira kareira no Edukasaun ida ne'e SEFOPE realiza hodi divulga informasaun ba Estudante finalista sira, bainhira sira remata estudu sira bele desidi sira-nia futuru. "Tinan-tinan SEFOPE sempre realiza feira kareira no edukasaun ba estudante finalista sira, objetivu hodi divulga informasaun ba alin estudante sira ne'ebé mak bainhira imi remata ona imi-nia estudu, oinsá mak atu bele asesu ba sentru akreditadu, sentru formasaun registradu, sentru formasaun komunitariu sira, atu nune'e bele lori ita boot sira hodi hetan empregu ka kareira ida ne'ebé iha ita boot sira nia vida tomak," dehan sekretariu Estadu iha serimónia abertura iha Jinaziu Maliana. Sekretariu Estadu fundamenta, Feira Kareira ida ne'e partisipa husi ezibitór prinsipál sira ne'e, estudante sira bele hetan informasaun liu-liu Informasaun kona-ba bolsa estudu no formasaun sira ne'ebé mak merkadu traballu presiza. "Ho nune'e ohin marka prezensa iha husi FDCH, sei fo informasaun ba ita boot sira oinsá mak bele asesu ba bolsa estudu, husi parte sentru formasaun sira oinsa bele divulga informasaun ba imi, hodi bele asesu ba formasaun ne'ebé ho kualidade no kulaifikasaun ne'ebé mak di'ak, hodi hatan ba merkadu rai laran no rai liur," tenik Sekretariu Estadu. Serimónia ida ne'e partisipa husi Reprezentante Prezidente Autoridade Munisipiu Bobonaro, Komandate PNTL munisípiu Bobonaru, Professor/a husi Eskola sira, Estudante no ezibitor sira.
Data Publica : 11 Sep 2025
Descrisaun :
