𝐌𝐄𝐓𝐈𝐍𝐀𝐑𝐎, 𝟎𝟗 𝐀𝐛𝐫𝐢𝐥 𝟐𝟎𝟐𝟔–Atu hametin setór indústria transformadora no habelar kbiit esportasaun produtu rai-laran, Ministru Komérsiu no Indústria Nino Pereira, akompaña husi Diretor Jerál Indústria hala’o vizita ba Kompañia NLB Nasalobu Unipessoal Lda iha Postu Administrativu Metinaro, ne’ebé durante ne’e hala’o atividade exportasaun ba produtu orijin Nu’u, Kami no Maek ba nasaun Indonézia no Tailandia.

Objetivu husi vizita ne’e atu enkoraja no motiva emprezáriu lokal sira hodi kontinua dezenvolve no aumenta atividade exportasaun produtu orijin ba merkadu internasionál. Iha vizita Ministru Nino Pereira destaka governo nia vizaun hodi dudu sétor privadu sira “𝘝𝘪𝘻𝘪𝘵𝘢 𝘯𝘦’𝘦 𝘮𝘰𝘴 𝘳𝘦𝘧𝘭𝘦𝘵𝘦 𝘱𝘢𝘱𝘦𝘭 𝘎𝘰𝘷𝘦𝘳𝘯𝘶 𝘯𝘪𝘢𝘯 𝘢𝘵𝘶 𝘱𝘳𝘰𝘮𝘰𝘷𝘦 𝘯𝘰 𝘩𝘢𝘴𝘢’𝘦 𝘷𝘢𝘭𝘰𝘳 𝘱𝘳𝘰𝘥𝘶𝘵𝘶 𝘛𝘪𝘮𝘰𝘳 𝘯𝘪𝘢𝘯 𝘪𝘩𝘢 𝘮𝘦𝘳𝘬𝘢𝘥𝘶 𝘮𝘶𝘯𝘥𝘪𝘢𝘭, 𝘩𝘰𝘥𝘪 𝘬𝘳𝘪𝘢 𝘰𝘱𝘰𝘳𝘵𝘶𝘯𝘪𝘥𝘢𝘥𝘦 𝘣𝘢 𝘬𝘳𝘦𝘴𝘪𝘮𝘦𝘯𝘵𝘶 𝘦𝘬𝘰𝘯𝘰𝘮𝘪𝘢 𝘯𝘰 𝘢𝘶𝘮𝘦𝘯𝘵𝘶 𝘳𝘦𝘯𝘥𝘪𝘮𝘦𝘯𝘵𝘶 𝘣𝘢 𝘦𝘮𝘱𝘳𝘦𝘻á𝘳𝘪𝘶 𝘴𝘪𝘳𝘢,” 𝙈𝙞𝙣𝙞𝙨𝙩𝙧𝙪 𝙆𝙤𝙢é𝙧𝙨𝙞𝙪 𝙣𝙤 𝙄𝙣𝙙ú𝙨𝙩𝙧𝙞𝙖, 𝙉𝙞𝙣𝙤 𝙋𝙚𝙧𝙚𝙞𝙧𝙖

Ministru husu ba emprezáriu timoroan sira atu kontinua buka oportunidade no alternativa sira hodi haboot nia negósiu, nune’e bele espanda produtu sira hodi tama iha merkadu internasionál nomos bele hetan fatin iha merkadu global.

Maske volume produtu sei ki’ik hodi responde ba demanda merkadu, maibé presiza iha inisiativa no estratéjia atu dezenvolve no sustenta negósiu ne’ebé iha.

Nain ba kompañia Julião Soares, agradese ba prezensa no atensaun husi Governu, bele fó motivasaun ba emprezáriu lokal sira atu kontinua melloria sira nia negósiu, inklui aumenta kapasidade produsaun hosi expanda iha merkadu.

Kompañia ne’e atualmente emprega traballadór hamutuk nain 65, ne’ebé kompostu husi traballadór estranjeiru nain 3, traballadór diária nain 50 no traballadór permanente nain 12.

𝙈é𝙙𝙞𝙖 𝙈𝘾𝙄