Díli, 09 abril 2026 – Sua Exelénsia Embaixadór Japaun nian ba Repúblika Demokrátika Timor-Leste Mr.Yamamoto Yasushi hala’o vizita kortezia ba Sua Exelénsia Ministra Edukasaun Dra.Dulce de Jesus Soares, no iha sorumutu ne’e halo diskusaun kona-ba asuntu lubuk iha parte Edukasaun Timor-Leste.

Hafoin diskusaun, iha entrevista Mr.Yamamoto Yasushi hateten, kontente tebes vizita Sua Exelénsia Ministra hodi deskute kona-ba asuntu lubuk relasiona ho Edukasaun no projetu sira ne’ebé implementa ona liuhosi suporta Governu Japaun nian no bele rona mós difikuldade sira ne’ebé parte Edukasaun hasoru no hein katak bele servisu hamutuk.

“Ha’u kontente tebes mai vizita Sua Exelénsia Ministra nia fatin no durante enkontru, ami halo diskusaun di’ak tebes kona-ba asuntu lubuk ida ne’ebé relasiona ho Edukasaun nian, no ha’u hato’o ba Sua Exelénsia Ministra relasiona ho projetu sira ne’ebé implementa ona liuhosi suporta finansiamentu Governu Japaun nian, no ha’u mós simu ona informasaun husi Sua Exelénsia Ministra relasiona ho difikuldade sira ne’ebé husi parte Edukasaun nian hasoru no ha’u hein ba oin ha’u bele servisu hamutuk no besik liután ho Timor-Leste liuliu iha parte Edukasaun nian”, dehan Sua Exelénsia Embaxadór Japaun.

Governante ne’e argumenta, Governu Japaun hala’o ona konstrusaun 50 resin ba eskola sira no haruka foinsa’e Japanezes sira hodi ajuda hanorin, liuliu iha matéria Matemátika no Edukasaun Fízika no projetu sira ne’e sei kontinua nafatin, iha tempu badak mós sei implementa programa apoiu foos ba Merenda Eskolár iha Ministériu Edukasaun liuhosi (WFP) ba eskola 350 ne’ebé lokaliza iha munisípiu Díli, Lautém, Covalima no Aileu ho totál orsamentu 6.000.000 doláres.

Governu Japaun mós oferese bolsu estudu ka (JDS) Japan Development Scholarship ba Timoroan sira hotu iha Ensinu Superiór liuliu iha área mestrada no ba Funsionáriu Públiku sira maibé infelizmente Governu Japaun seidauk iha bolsu estudu ba iha Nível Ensinu Sekundáriu no Governu Japaun iha Timor-Leste konsege haruka ona timoroan hamutuk 140 resin mak bá hala’o estudu iha Japaun.

#EliasdaCosta

#MédiaME