𝗗Í𝗟𝗜, 𝗠𝗝 — 𝗞𝗶𝗻𝘁𝗮-𝗳𝗲𝗶𝗿𝗮, 𝟬𝟵 𝗔𝗯𝗿𝗶𝗹 𝟮𝟬𝟮𝟲, Súa-Eselénsia Ministru Justisa, Dr. Sérgio de Jesus Fernandes da Costa Hornai, partisipa audiénsia públika no fó hanoin kona-bá proposta lei nú. 16/VI/(3a) ne'ebé hakarak altera lejislasaun eleitorál, iha sala GMPTL, Parlamentu Nasional.

Objetivu prinsipál hosi audiénsia ida-ne’e, atu rona kle’an inisiativa sira ne’ebé atualmente promove husi proponente sira, liuhosi Deputadu sira hosi Komisaun A, ne’ebé trata kona-ba asuntu Konstitusional no Justisa iha Parlamentu Nasionál.

Ministru justisa hateten, kona-bá kompozisaun orgáun eleitorál ida ne'ebé iha ninia prestíjiu no dignidade hodi bele konduz prosesu eleitorál iha eleisaun tolu ne'ebé importante hanesan; Eleisaun Presidensiál, Eleisaun Parlamentu Nasionál, no poder lokal. Audiénsia ida-ne'e iha ninia kompeténsia atu hare kona-ba situasaun tolu ne'ebé importante tebes.

Audiensia ne’e organiza hosi komisaun A, Parlamentu Nasional bá prosesu alterasaun lejislasaun eleitorál tenke halo ho transparénsia, inkluzivu, no responsabilidade, atu asegura sistema eleitorál ne'ebé forte, kredível, no refleta vontade povu nian.

Iha diskusaun no revizaun lejislativa, liu-liu kona-ba esbosu alterasaun ba Lei nú. 5/2006, loron 28 fulan-Dezembru, ne’ebé regula órgaun administrasaun eleitorál sira, nune’e mos Lei nú. 22/2021 kona-ba eleisaun munisipál, prosesu ida-ne’e assume importánsia estratéjika ba fortalese sistema demokrátiku iha rai-laran.

Alterasaun sira-ne’e, prinsipálmente ba Artigu 5, Artigu 7 no Artigu 8, ne’ebé aborda kona-ba kompozisaun, mandatu no kompeténsia hosi órgaun administrasaun eleitorál sira.

Audiénsia ne'e, prezide hosi Prezidente Komisaun A ne’ebé trata kona-bá Asuntu Konstitusionál no Justisa, iha Parlamentu Nasionál, Deputadu Natalino do Santos, hamutuk ho deputadu sira ne’ebé integra iha komisaun espesializada ne’e.

Ministru-Justisa hamutuk ho Vise-Ministru Asuntus Parlamentares, Adérito Hugo da Costa, Sekretária Estadu Igualdade, Elvina de Sousa Carvalho, Sekretáriu Estadu Dezenvolvimentu Lokál, Mateus dos Santos Tallo, asesor no tekniku sira hotu.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #