Sorumutu konsellu Ministrus ne’ebe hala’o iha loron 8 fulan Abril tinan 2026 iha Palasiu Governu ne’ebe lideradu husi Sua Exelénsia Primeiru Ministru Kay Rala Xanana Gusmão no partisipa mos husi Sua Exelénsia Sekretária Estadu ba Igualdade, Elvina Sousa Carvalho nomos Membru Governante sira seluk.

Iha somutu ne’e Konsellu Ministu aprova ona projetu Arkitetóniku ba sentru Konvesaun Dili Foun, hafoin análize ba propostas modelu arkitetóniku ne’ebé aprezenta hosi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay. Projetu estruturante ida-ne’e ho objetivu atu sai uma-na’in ba reuniaun sira ASEAN nian durante Timor-Leste nia prezidénsia iha tinan 2029, inklui simeira Xefe Estadu no Xefe Governu sira nian, no mós eventu ho dimensaun boot sira seluk.

Nune’e mós ho proposta husi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, Konsellu Ministrus aprova projetu Rezolusaun Governu ba nomeasaun Duílio Marino Gusmão Araújo da Silva nu’udar Diretór Ezekutivu ba Ajénsia Promosaun Investimentu no Esportasaun Timor-Leste, IP, ne’ebé koñesidu ho naran TradeInvest Timor-Leste.

Iha sorumutu ne’e mos Konsellu Ministrus aprova mós projetu Rezolusaun Governu, ne’ebé aprezenta hosi Ministru Administrasaun Estatál, Tomás do Rosário Cabral, kona-ba orientasaun polítika jerál Governu nian sobre divizaun administrativa territóriu no rekoñesimentu ba suku no aldeia sira.

Rezolusaun Governu ida-ne’e ho objetivu prinsipál atu asegura estabilidade divizaun administrativa territóriu nian, atu nune’e bele garante koezaun territoriál, kontinuidade prestasaun servisu públiku ba populasaun, no preparasaun adekuada ba prosesu eleisaun prezidensiál iha tinan 2027.

Ikus liu Hafoin aprezentasaun husi Vise-Ministra Finansas, Regina de Jesus, Konsellu Ministrus delibera hodi autoriza Ministra Finansas atu asina akordu subvensaun rua ho Ajénsia Kooperasaun Internasionál Korea (KOICA) ba projetus kona-ba Dezenvolvimentu Kapasidade Restaurasaun Florestál no Jestaun Sustentável iha Timor-Leste (2026–2033) no mós Programa Integradu Nutrisaun no Seguransa Alimentár, Alimentasaun Eskolár, Fortifikasaun Alimentár, Fortifikasaun Ai-han no Infraestrutura Eskolár sira (2026–2030).

Projetu restaurasaun floresta ne’e, ho subvensaun prevee dolar amerikanu millaun 6 no durasaun tinan neen, kobre munisípiu Baukau no Manatutu. Ninia objetivu maka reforsa prevensaun ba degradasaun ambientál no promove rekuperasaun ekosistema florestál sira, liuhosi modernizasaun sentru viveiru nasionál, implementasaun programa reflorestasaun, no mós kapasitasaun instituisoins públikas no komunidade lokál sira. Prevee mós envolvimentu diretu husi tékniku no funsionárius públiku, no mós partisipasaun ativa husi komunidade sira iha jestaun sustentável ba floresta.

# Media SEI#