𝐋𝐀𝐔𝐓É𝐌, 𝟎𝟕 𝐀𝐁𝐑Í𝐋 𝟐𝟎𝟐𝟔 – Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, tersa liubá partisipa iha serimónia Festivál Meci 2026, ne’ebé realiza iha Totina Valu-Sere, suku Tutuala, Postu Administrativu Tutuala, Munisípiu Lautém.

Serimónia Festivál Meci ne’e hanesan tradisaun kulturál importante ba komunidade Tutuala, ne’ebé realiza kada tinan hodi kaptura Meci, ne’ebé konsidera hanesan patrimóniu kulturál no valor turístiku importante ba Timor-Leste.

Iha okaziaun ne’e, Sekretáriu Estadu Peskas hateten katak Governu liu husi Sekretaria Estadu Peskas sei kontinua apoia preservasaun tradisaun kulturál ne’ebé liga ho tasi no rekursu mariñu, nune’e bele promove sustentabilidade peskas no dezenvolvimentu turizmu lokál.

“Ha’u admira ho paisajen ne’ebé Tutuala iha, tanba ne’e ha’u hakarak reafirma, Tutuala iha área protejida Mariñu tolu, área hirak ne’e atu hatete ita tenke proteje ho didi’ak, hodi bele hatudu nia karakter sustenbilidade, katak goja ohin, aban no ba jerasaun sira”.

Alende ne’e, Sekretáriu Estadu mós subliña katak Festival Meci la’ós de’it eventu kulturál, maibé mós oportunidade atu hametin kooperasaun entre Governu, autoridade lokál, no komunidade peskadór sira hodi jere rekursu tasi ho maneira sustentável.

Serimónia ne’e partisipa mós hosi autoridade lokál sira, Lia-na’in, komunidade Tutuala, no vizitante sira husi rai laran no rai liur, ne’ebé mai atu asiste no partisipa iha atividade kulturál sira durante Festival Meci 2026.

Festival Meci 2026 iha Totina Valu-Sere espera bele fó impaktu pozitivu ba ekonomia lokál, promove turizmu, no hametin identidáde kulturál komunidade iha Munisípiu Lautém.

Portantu iha serimónia ne’e, Lideransa Peskas ne’e hamutuk ho kolega membru governu sira seluk, atribui mós Bero ho marka Eviota Santanai unidade 3, inklui ho mákina, tali ho ankur no jaket salva vida ba grupu peskadór sira iha área Tutuala nian.