𝐋𝐀𝐔𝐓É𝐌, 𝟎𝟕 𝐀𝐁𝐑Í𝐋 𝟐𝟎𝟐𝟔 – Governu liuhosi Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, akompaña hosi Sekretáriu Estadu Florestas, Eng. Fernandino Vieira da Costa, halo distribuisaun Bero ho marka Eviota Santanai unidade 13, inklui fasilidade hanesan mákina, tali ho ankur, no jaket salva vida ba peskadór sira, iha Lospalos no Tutuala, Munisípiu Lautém.

Objetivu husi apoiu ekipamentu peskas ne’e atu hadi’a kapasidade peskadór sira hodi bele fasilita atividade peskas, nune’e bele aumenta volume kapturasaun ikan ne’ebé depois bele fornese ba konsumu família no mós ba merkadu lokál, atu kontribui ba dezenvolvimentu ekonomia komunidade.

Iha serimónia entrega ne’e, Prezidente Autoridade Munisípiu Lautém ho peskadór sira husi área refere simu direta ekipamentu peskas sira ne’ebé Governu prepara atu responde ba nesesidade komunidade peskadór sira iha munisípiu ne’e.

Iha intervensaun, Sekretáriu Estadu Peskas nian hateten, Governu kontinua kompromete atu fó apoiu ba peskadór sira iha territóriu tomak, liu husi fornese fasilidade peskas hodi hadi’a produtividade no garante seguransa alimentar ba populasaun.

“Ita agradese ba Lospalos oan sira ne’ebé iha prinsipiu di’ak halo operasaun iha tasi, se ho apoiu hirak ne’e mak imi hasae produsaun, no konsege redus númeru importasaun ikan, ne’e imi 𝘭𝘶𝘢𝘳 𝘣𝘪𝘢𝘴𝘢”.

Alende ne’e Lideransa Peskas ne’e mós hato’o agradese ba Prezidente Autoridade Munisípiu Lautem, tanba alerta ona ba nia populasaun sira fundamentu tebes, tanba ne’e atu nafatin dezafia Autoridade lokál sira atu sai matan, ibun no tilun ba servisu Estadu nian liuliu iha Munisípiu, hodi kontinua kontrola ekipamentu hira ne’ebé Governu atribui ona ba peskadór sira.

“Ami mai atribui ona ekipamentu hirak ne’e, ami sei la mai loron-loron hodi kontrola, tanba na’in loloos mak Prezidente Autoridade ho nia estrutura sira, tanba ne’e alerta sira konsideradu hodi ita hotu bele kontribui iha servisu Peskas nian”.

Iha parte seluk, Sekretáriu Estadu Florestas mós enfatiza katak kolaborasaun entre setór peskas no florestas importante atu asegura sustentabilidade rekursu naturál sira, nune’e komunidade bele kontinua utiliza rekursu tasi ho responsabilidade no sustentavel.

Serimónia ne’e mós hetan partisipasaun hosi autoridade lokál sira, lideransa komunitáriu, no peskadór sira, iha Munisípiu Lautém.