𝗝𝗮𝗸𝗮𝗿𝘁𝗮, 𝟬𝟵 𝗔𝗯𝗿𝗶𝗹 𝟮𝟬𝟮𝟲

Ministru Obras Públikas Samuel Marçal akompaña husi Prezidenti Instituto de Gestão de Equipamentos e Aprovisionamento para o Desenvolvimento, IGE-ADI I.P, Ana Paula da Cruz, Diretor Ezekutivu, Sonio Anuno Sarmento da Silva ho Xefe Aprovizionamentu Ministériu Obras Públikas, Isabel Maria Lay Guterres hala’o vizita bá iha PT.United Tractor Surabaya, iha loron tersa-feira ne’e.

Durante vizita ne'ebé hala'o iha PT.United Tractor Surabaya, Ministru Obras Públikas (MOP), Samuel Marçal, hato'o pedidu ofisiál bá PT.United Tractor atu bele loke sira-nia ofísiu (representasaun) iha Timor-Leste atu nune’e sira bele fasilita manutensaun bá ekipamentu pezadu sira Timor-Leste ho prezensa direta iha Timor-Leste, kestaun tékniku no manutensaun bá makina pezada sira bele rezolve ho lalais liu tan no la han tempu ne’ebé naruk.

Ministru Obras Públikas mós husu sira kona-bá posibilidade atu fó formasaun bá tékniku timoroan sira husi IGEAD, I.P. atu sira bele iha koñesimentu kle'an kona-bá operasaun no reparasaun bá ekipamentu Komatsu nian.

Vizita ida-ne'e konsidera hanesan pasu estratéjiku ida atu asegura katak ekipamentu pezada ne'ebé Estadu sosa iha sustentabilidade no bele uza bá tempu naruk no hakarak buka-hatene mós kona-bá tipu makina ne'ebé sai prioridade bá MOP iha tinan ne'e.

Iha vizita ne'e, Ministru Obras Públikas ho delegasaun observa direitamente Service Office no fasilidade PT.United Tractor nian iha Surabaya.

https://sdi.gov.tl/ministerio/presrealease/create 

*𝗠𝗶́𝗱𝗶𝗮-𝗠𝗢𝗣