Bazartete, 10 Abril 2026 – Sekretáriu Estadu Kooperativas (SEKoop), Eng. Arsénio Pereira da Silva, M.Agr., akompaña husi Prezidente Autoridade Munisípiu Liquiçá, Paulino Ribeiro, ofisialmente inagura edifísiu Cooperativa Multi-Sektorál Motaulun (CMM), iha Suku Motaulun, Postu Administrativu Bazartete, Munisípiu Liquiçá, iha Sesta-feira dadersan.

Iha diskursu okaziaun, Sekretáriu Estadu Kooperativas hato’o apresiasaun ba dezenvolvimentu CMM ne’ebé hatudu progrezu di’ak no kontribui ba krésimentu ekonomia membru sira nian. Nia mós kongratula kooperativa ne’ebé eziste kleur ona no agora hetan apoiu husi Governu liu husi orsamentu tinan fiskal 2025, iha kategoria transferénsia públiku, hodi bele konstrui edifísiu foun ne’e.

Nia husu ba dirijente no membru sira atu halo Asembleia Jerál Anuál ho di’ak, no diskute hamutuk kona-ba planu asaun anuál no planu estratéjiku, hodi garante implementasaun programa sira ne’ebé bele fó benefísiu ba membru hotu-hotu no sustenta dezenvolvimentu kooperativa iha futuru.

Iha tempu hanesan, Prezidente Autoridade Munisípiu Liquiçá, Paulino Ribeiro, ne’ebé mós hanesan fundadór CMM, hato’o agradese ba IX Governu Konstitusionál liu husi lideransa SEKoop ne’ebé fó ona apoiu orsamentu hodi kompleta edifísiu kooperativa nian. Nia mós husu atu kontinua fó apoiu liu husi formasaun, akompañamentu no supervizaun hodi asegura sustentabilidade kooperativa iha tempu oin.

Atu hatene, CMM iha membru hamutuk ema nain 19, no hala’o atividade sira iha área agrikultura, peskas, pekuária, komérsiu no indústria. Rezultadu husi atividade sira ne’e sai hanesan fonte rendimentu ba membru sira hodi sustenta ekonomia familiar.

Hafoin serimónia inaugurasaun, SEKoop hamutuk ho PAM no membru sira halo vizita kortezia ba atividade membru sira nian, inklui hakiak manu broiler, kiosk no hare rai ne’ebé kooperativa prepara hodi harii edifísiu permanente iha futuru.

#Média SEKoop#