Dili, 13 abríl 2026 - Sua Exelénsia Ministra Edukasaun Dra. Dulce de Jesus Soares hamutuk ho Prezidente INFORDEPE no mós Parseiru sira halo abertura ba formasaun kona-ba “Kurríkulu Baze” síklu datoluk ensinu báziku tinan 2026 iha salaun Ian Martin INFORDEPE Matadouro.

Iha diskursu, Sua Exelénsia Ministra Edukasaun Dra. Dulce de Jesus Soares hateten, ho ksolok boot loke série formasaun tinan 2026 nian kona-ba “Currículo Base 3º Cíclo do Ensino Básico”. Ha’u haksolok tebes hodi haree katak formasaun ba klase 8 hahú ona agora, iha fulan abríl nia laran.

"Ha’u hatene katak kurríkulu ne’e ho ninia manuál sira kria ona ho kualidade sientífiku no domin boot liuhosi konsultasaun no revizaun dala barak hosi ema barak. Maibé, kurríkulu ho kualidade aas mós sei la fó rezultadu ba implementasaun ne’ebé efetivu no aprendizajen di’ak ba estudante sira, se laiha formasaun no preparasaun ne’ebé natoon" tenik SE. Ministra.

Governante ne'e akrexenta, bainhira hahú fali série formasaun ida-ne’e, ne’ebé hahú ho semana tolu (Formasaun ba Formadór) iha Díli molok hatutan ba munisípiu sira, postu administrativu sira no eskola sira.

Entretantu, Koordenadora Projetu Edukasaun iha UNESCO Sra. Hye Young (Hailey) KIM argumenta katak, ohin loron, marka tan pasu signifikativu ida iha Reforma Kurríkulu Terseiru Siklu Ensinu Báziku nian ne’ebé hahú ona iha tinan 2024.

Kurríkulu foun ne'e bazeia ba prinsípiu igualdade, inkluzividade, no aprendizajen partisipativu. Ida-ne'e inklui mós metodolojia pedagójika ne'ebé bazeia ba “Inquiry-based learning” ne’ebé bele adapta ba kontestu lokál, hodi foti valór kulturál no sosiál Timor-Leste nian ne’ebé riku tebes.

Kurríkulu ne’e mós dezeña hodi promove abilidade ne'ebé ita-nia foin-sa’e sira presiza duni, hanesan hanoin krítiku, kolaborasaun, komunikasaun, kreatividade, no kapasidade atu rezolve problema reál iha sira-nia komunidade, iha nível nasionál, to’o nível globál.

#EliasdaCosta

#MédiaME