𝗗Í𝗟𝗜, 𝗠𝗝 — 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮 𝟭𝟯 𝗔𝗯𝗿𝗶𝗹 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai hamutuk ho Provedór Direitus Humanus no Justisa, Virgilio Guterres “Lamukan” ofisiálmente abertura formasaun Quadrilateral ba Kargu Diresaun no Xefia iha ambitu Ministériu Justisa, iha sala Ministeriu Justisa, Colmera, Díli.

Objetivu prinsipal formasaun ne’e, atu reforsa kapasidade kargu diresaun no Xefia iha Ministériu Justisa, hodi aumenta kualidade jestaun, koordenasaun servisu, no efisiénsia administrativa iha setor justisa. Formasaun ne’e hala’o durante loron tolu, hahu hosi 13 to’o 15, ho tema “𝗣𝗥𝗘𝗩𝗘𝗡𝗘 𝗡𝗢 𝗞𝗢𝗠𝗕𝗔𝗧𝗘 𝗞𝗢𝗥𝗨𝗣𝗦𝗔𝗨𝗡 𝗛𝗢𝗗𝗜 𝗣𝗥𝗢𝗠𝗢𝗩𝗘 𝗚𝗢𝗩𝗘𝗥𝗡𝗔𝗦𝗔𝗨𝗡 𝗗𝗜’𝗔𝗞 𝗡𝗢 𝗣𝗥𝗢𝗧𝗘𝗝𝗘 𝗗𝗜𝗥𝗘𝗜𝗧𝗨𝗦 𝗨𝗠𝗔𝗡𝗨𝗦 𝗜𝗛𝗔 𝗦𝗘𝗥𝗩𝗜𝗦𝗨 𝗔𝗗𝗠𝗜𝗡𝗜𝗦𝗧𝗥𝗔𝗦𝗔𝗨𝗡 𝗣𝗨́𝗕𝗟𝗜𝗞𝗨”

“Ohin loron ida importante tebes, ita halo abertura ofisiál ba kursu formasaun ida ne’ebé direksionadu ba kargu xefia no dirijente sira iha ambitu Ministériu Justisa, ne’ebé providénsia hosi Provedor Direitus Umanus. Inisiativa ida-ne’e hatudu kompromisu instituisaun sira hodi kontinua haburas kapasidade lideransa no profisionalizmu iha setor públiku”Ministru Justisa, Dr. Sérgio Hornai hateten.

Ministru Justisa hateten, ko’alia kona-bá tema sentral iha aspetu prinsipál tolu tenke kontinua fó atensaun: dahuluk, oinsá atu bele hadi’a no moderniza administrasaun públika; daruak, oinsá atu asegura katak prestasaun servisu públiku hala’o ho responsabilidade no transparénsia; no datoluk, oinsá atu fó atendimentu ida ne’ebé di’ak liu ba ita nia sidadaun sira.

“Ita presiza duni kuadru sira ne’ebé iha kapasidade teknika no lideransa ne’ebé forte, ho kbiit atu halo koordinasaun no artikulasaun di’ak iha implementasaun tarefa sira ne’ebé atribuídu ona. Lideransa ida ne’ebé klaru no orientadu ba rezultadu sei ajuda tebes iha diresaun servisu lor-loron nian, hodi garante katak resposta ba nesesidade sidadaun sira bele efisiente no efetivu” Ministru Justisa hateten.

Prevensaun no kombate korupsaun kontinua sai hanesan pilar fundamentál iha administrasaun públika. Medida sira iha área ida ne’e la’ós de’it atu prevene prátika ne’ebé la loos, maibé mos atu konsolida Estadu ida ne’ebé forte, íntegro no konfiável.

“Ita hotu-hotu iha responsabilidade atu asegura katak prinsípiu sira governasaun di’ak ne’e la’ós de’it sai hanesan diskursu, maibé implementa duni iha prátika lor-loron nian, hodi fó benefísiu real ba ita nia sidadaun sira”.

Ho kursu formasaun ida-ne’e, sei fó kontribuisaun signifikativu ba haburas kapasidade lideransa no integridade iha Ministériu Justisa, atu bele kontinua presta servisu públiku ida ne’ebé di’ak liu, profisionál no konfiável ba Repúblika Demokrátiku Timor-Leste.

Ministru Justisa fó agradesimentu ba prezensa hosi Diretor-Jeral, Diretor Nasionál no Xefe Departamentu sira, iha ambitu Ministériu Justisa hamutuk ho ekipa Provedor Direitus Umanus ninian.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #